Úlfar Þormóðsson 30/09/2014

Sjálfsskaparvíti

 

Heilbrigðisráðherra skilur þörf lækna fyrir launahækkun, nýjan Landsspítala og lækningatæki sem virka þegar gripið er til þeirra. En hann kveðst ekkert geta gert í málinu annað en að tala við fjármálaráðherra sem skilur hann en kveðst ekkert geta gert í málinu því að það eru engir peningar í ríkissjóði vegna þess að hann hefur aflétt sköttum af eignafólkinu með samþykki heilbrigðisráðherra sem skilur fjármálaráðherra og styður hann sem geldur líku líkt og styður heilbrigðisráðherra af alhug líkt og allir hinir ráðherrarnir í ríkisstjórninni. Þeir eru aldeilis ráðalausir frammi fyrir hruni heilbrigðiskerfisins.

3720580355_676da791a0_z

Ráðleysisstjórnin, sem orðin er minnihlutastjórn samkvæmt könnunum, getur gripið til ýmissa ráða ef hún opnaði eyrun, hlustaði á fólkið í landinu. Hún gæti orðið meirihlutastjórn ef hún færi að vilja þess, sem er, að bjarga heilbrigðiskerfinu frá hruni og einkavæðingu. Hún gæti skapað samstöðu, einhug, með þjóðinni, gæti orðið ríkisstjórn fjöldans.

En hún má það ekki. Þeir banna það sem komnu henni til valda með styrkjum í kosningum, þeir sem þingmeirihlutinn á líf að launa. Útgerðin bannar þeim að hækka veiðigjöld til þess að reisa Landsspítala, þeir sem eiga fé á banka og stóreignir heima og erlendis banna þeim að hækka fjármagnsskatt til þess að kaupa lækningatæki, þeir sem eiga gotterís- og ölgerðir banna þeim að hafa háa skatta á sykur sem gæti nægt fyrir hærri launum til hjúkrunarfólks.

Ráðleysisstjórninni er ekki sjálfrátt. Henni er fjarstýrt. En hún gæti náð sér á strik með fulltingi almennings. En hana skortir kjarkinn sem þarf. Hún er því ekki bara ráðalaus, hún er líka huglaust vesaldarhandbendi sérgróðamanna. Hún þyrfti endurhæfingu með allt sitt þinglið. En þar er biðlisti. Af hennar völdum.

Úlfar Þormóðsson
Latest posts by Úlfar Þormóðsson (see all)
Flokkun : Pistlar
0,721