Ranghverfa

Þingflokksformaður Framsóknarflokksins kvartar undan því að allt of fáir skilji flokkinn hans. Ég er ekki viss um að hann hafi rétt fyrir sér í þessu efni. Það gæti verið á hinn veginn. Að þingflokksformaðurinn skilji ekki ráðherra flokksins. Og ekki fjármálamennina sem ráða honum með þeim.

Fyrir mörgum liggur framganga ráðamanna Framsóknarflokksins í augum uppi. Þar má nefna ástæðuna fyrir því að Húsnæðismálastofnun var látin taka á leigu ónotaða byggingu norður á Sauðárkróki til þess að geyma í húsbréf. Húsnæðið var í eigu Kaupfélagsins en gaf ekkert af sér. Félagið er í höndum framsóknarmanna eins og alkunna er og þjónar þeirra eru í aðstöðu til þess að taka bygginguna á leigu fyrir hönd hins opinbera. Óhagræðið af þessu er hins vegar það að oftar en ekki þarf að líta á þessi bréf hér syðra og þess vegna er stöðugt verið að færa þau fram og til baka. Þetta eru vandkvæði sem kosta mikið en bitna á öllum öðrum en flokksgæðingunum.

Þeir eru líka býsna margir sem eru að átta sig á því hvers vegna framsóknarráðherrarnir vilja flytja Fiskistofu fyrirvaralaust norður á Akureyri og koma henni fyrir í dýrasta leiguhúsnæði staðarins. Það er vegna þess að framsóknarmenn byggðu húsið og eiga það enn eftir því sem mitt er mál og minni. Leigutakart með frjálsar hendur hafa hrakist burt úr húsnæðinu vegna þess hve leigan er há. Tekjur gæðinganna minnka. Undir þeirra þaki sitja nú eftir nær eingöngu  opinberar og hálf opinberar stofnanir. Ákvörðun um það hvort þær verði þar áfram eða fari þaðan er í höndum framsóknarmanna. En við borgum leiguna. Skattgreiðendur.

Af framansögðu má fastlega gera ráð fyrir því að það sé rangt hjá formanni þingflokksins að of fáir skilji Framsóknarflokkinn eins og hann er orðinn. Þingflokksformaðurinn virðist vera einn af fáum sem ekki skilja hann.