Úlfar Þormóðsson 12/10/2014

Litlu börnin leika sér

Forsætisráðherrann var í „góðlátlegu viðtali“ við Loga Bergmann á Stöð 2 í opinni dagskrá á föstudagskvöldið. Logi sagðist ekki ætla að ræða við hann um pólitík og spurði hann þess vegna hverslags flokkur Framsókn væri. Ráðherrann var kímileitur og sagði:sigmundur-david„Við erum kosningaflokkur … ekki ímyndarflokkur!“

Þetta er merkilegt svar og af þeirri gerð sem illmögulegt er að leggja út af nema að lenda í ógöngum. Gæti þó skýrt til fulls pólitíska vegferð flokksins að undanförnu.

Formaðurinn var glaður og reifur og hafði leyft Loga að „lauma“ upptökuvél á sig í hádegi fyrir útsendingu þáttarins, „án þess að þú tækir eftir því“, sagði þáttastjórnandinn. Svo fór forsætis út að borða. Fékk sér feitt két og baunir og uppstúf og súpu og tvær pulsur með öllu og gaf öndunum við Tjörnina með sér. Síðan fór hann að leika sér, lyfta sér upp eða búa sig undir dagsins önn og tók til við að kasta pílum í ljósmynd af fyrirrennara sínum, Jóhönnu Sigurðardóttur áður en hann fékk sér ís í eftirrétt. Þroskandi og skemmtileg iðja.

Allt var þetta mjög „góðlátlegt“ og hláturdósirnar glumdu í sjónvarpinu undir pílukastinu. Framsóknarflokkurinn er kosningaflokkur, ekki ímyndarflokkur. Forsætisráðherra landsins er formaður hans.

Úlfar Þormóðsson
Latest posts by Úlfar Þormóðsson (see all)
Flokkun : Pistlar
0,809