Úlfar Þormóðsson 18/10/2014

Lekabyttur

 

Það eru engar líkur til þess að Hanna Birna segi af sér. Nema lekamálinu lykti með því að hinn ákærði upplýsi hver lak og að sá hinn sami hafi gert það að ósk ráðherra. Sem verður að teljast vafasamt.

Hanna Birna

Hitt fer um götur í lágu hvísli, sem slúður, og komið frá lekabyttum stjórnarflokkanna, þeim sem ekki fá þar þann frama sem þeir telja sig eiga skilið, að uppstokkun í ráðherraliði stjórnarinnar sé á næsta leiti. Enda komið ár síðan Sigmundur Davíð lýsti því yfir að fimmti framsóknarmaðurinn kæmi inn í ríkisstjórn innan skamms. Og þá verður stokkað.

Bytturnar segja að það sé óvíst með öllu hver nær fremst í þeim ruðningi sem nú á sér stað í þingliði framsóknar. Það eru fáir sem veðja á Vigdísi Hauksdóttur nema hún sjálf og jafnfáir sem veðja á Ásmund Einar Daðason. Samt munu þau vera líklegustu kandídatarnir.

Ásmundur Einar Daðason

Helsti hvatinn að þessu brambolti nú er afstaða frammara til virðisaukaskattsins. Og auðvitað vandræði Hönnu Birnu. Formaður hennar ræður ekki við að setja hana af, hún er jú varaformaður flokksins með öldungadeild hans á bak við sig. Þess vegna er nú verið að leggja kapal miðað við breyta stjórnskipan og tvískipti innanríkisráðuneyti. Þá yrði Hanna Birna færð til og gerð að utanríkisráðherra, Gunnar Bragi færi í dóms- og kirkjumálaráðuneyti og nýi maðurinn í stjórninni yrði skertur innanríkisráðherra Eftir því sem lekabytturnar hvísla. Og vilja láta spyrjast út. Hvort eitthvað er að marka þetta hjal þeirra leiðir tíminn í ljós.

Úlfar Þormóðsson
Latest posts by Úlfar Þormóðsson (see all)
Flokkun : Pistlar
1,017