Úlfar Þormóðsson 14/11/2014

Kveikjum upp

 

„Mótmælin“ á Austurvelli eru eins og gælur. Daður við stjórnvöld. Í gegn um ávörp fundarmanna heyrist undirtónn sem er þessi: Hættið þessari vitleysu, verið góð við okkur, snúið við blaðinu og stefnið að því að verða besta ríkisstjórn lýðveldissögunnar!

Þetta er væll barinna þræla.

Eldgos

Ríkisstjórnin hefur gefið útgerðinni tugi miljarða. Hún hefur gefið ferðaþjónustunni annað eins. Hún hefur vanrækt sjúkrahús, vanrækt almennatryggingakerfið, vanrækt skólakerfið, hún vanrækir landvernd, vanrækir fiskirannsóknir. Hún heldur læknum í verkfalli, heldur tónlistakennurum í verkfalli, flytur starfsmenn ríkisstofnana nauðungarflutningi á milli landshluta, hún sem heild lýgur að okkur og því til viðbótar sáldra einstaka ráðherrar yfir okkur sykruðum ósannindum dögum oftar, hún hrekur burðuga menn úr störfum og dillar þess í stað vanþroska embættismönnum, sníkir vopn handa þeim í útlöndum, byssur sem þeir bíða í eftirvæntingu eftir að fá að sýna okkur með þeim hætti að við gleymum því aldrei.

Þetta er ríkisstjórn óheilinda. Vanhæf stjórn sem er að brjóta niður samfélag okkar. Hún er ömurleg. Við þurfum að koma henni frá áður en verra hlýst af setu hennar en þegar er orðið. Og við getum svipt hana völdum. En það gerum við hvorki með blíðmælgi, þjóðhátíðarstemmingu né brekkusöng. Það þarf annað og miklu meira til. Fyrsta skrefið er að breyta mótmælafundum okkar á Austurvelli úr vælum og gælum í háværa firðlausa baráttu sem byltir henni frá völdum og úr sætum nýju 13 miljón króna Landróver-jeppanna sem við vorum látin borga undir þá að lokinni 480 króna máltíð dagsins. Kveikjum eldinn í okkur strax næsta mánudag.

Úlfar Þormóðsson
Latest posts by Úlfar Þormóðsson (see all)
Flokkun : Pistlar
0,973