Úlfar Þormóðsson 11/08/2014

Hundalógík

Guðlaugur Þór Þórðarson var heilbrigðisráðherra fyrir Hrun. Eins og alkunna er svelti hann sjúkrahúsin af rekstrarfé í tilraunum sínum til þess að einkavæða heilbrigðiskerfið. Nú er hann varaformaður fjárlaganefndar Alþings. Undir hans varaformennsku er enn verið að svelta sjúkrahús og Sjúkratryggingar geta ekki sinnt lögboðnu hlutverki sínu vegna fjárskorts. Landsspítalinn getur það ekki heldur. En báðar stofnanirnar halda þó áfram að gera það sem þeim ber. Samkvæmt lögum. Þess vegna eyða þær um efni fram, meiru en nemur skammtinum frá Guðlaugi og félögum hans í fjárlaganefnd. Slík hegðun heitir framúrkeyrsla á máli varaformannsins sem segir að hún verði ekki liðin áfram. Þetta hefur hann predikað dögum saman, nú síðast í hádegisfréttatíma Ríkisútvarpsins í dag, 11. ágúst. Yrði farið eftir fyrirmælum hans þyrftu Sjúkratryggingar að brjóta lög og Landsspítalinn (og sjálfsagt fleiri sjúkrahús) annað hvort að loka um lengri eða skemmri tíma til þess að jafna reikningana eða að hætta að taka við nema svo sem þriðja hverjum þeim sem sjúkur er, hversu aðkallandi sem það væri fyrir þann sem vísað væri frá að komast undir læknishendur.

Í sama fréttatíma boðar téður varaformaður að lengi hafi vilji staðið til þess að Ísland væri í hópi þeirra landa sem bjóði best lífskjör. Á netinu hefur útvarpið eftir honum á prenti og í gegn um rafþulu: „Og ef við ætlum að komast þangað þá þýðir það einfaldlega að við þurfum að hafa aga í ríkisfjármálum. Agi í ríkisfjármálum þýðir að stofnanir geta ekki farið fram úr heimildum eins og þær hafa gert á Íslandi á síðustu árum og áratugum

Og eftir situr hlustandinn með þversögn rökleysunnar í eyrunum og þjóðhættulegan varaformann í fjárlaganefnd.

Úlfar Þormóðsson
Latest posts by Úlfar Þormóðsson (see all)
Flokkun : Pistlar
0,733