Hugmyndafræði í stað langs lista stefnumála

Nú hafa margir eflaust tekið eftir því að Píratar í Reykjavík eru ekki beint með langan lista af stefnumálum fyrir komandi borgarstjórnarkosningar. Það sem við höfum kannski ekki verið nógu dugleg við að kynna undanfarið er það hvers vegna við höfum þetta svona. Við hefðum auðveldlega getað ályktað um allt milli himins og jarðar út frá grunnstefnu Pírata. Það sem er svo skemmtilegt við þetta fyrirkomulag er að þetta er viljandi gert. Gallinn við að vera með langa stefnuskrá fyrir kosningar er sá að það er mikil hætta á því að ályktað sé um mörg málefni sem er svo ekki hægt að standa við þegar uppi er staðið.

Það er því mikilvægt fyrir Pírata að kosningar haldi í raun áfram eftir sveitastjórnarkosningar. Málefnavinnan mun halda áfram af fullum krafti og við munum álykta um ýmis mál þegar þau koma upp og þegar við vitum nægilega mikið um þau til þess að geta tekið vel upplýsta afstöðu til þeirra. Þetta hefur reynst Pírötum á landsvísu mjög vel og tel ég að þetta muni nýtast okkur vel í borgastjórn.

Það sem Píratar leggja mesta áherslu á er breytt hugmyndafræði í stjórnmálum. Það er ekki mikið talað um hlýðni gagnvart ákveðinni flokkslínu innan Pírata og við höfum haft þá hugsjón að draga úr miðstýringu eins mikið og hægt er, sérstaklega þegar kemur að flokksstarfi. Þetta er mjög róttækt og nýtt fyrirkomulag og nýju fólki sem kemur inn í flokkinn bregður gjarnan við að sjá hvernig við höldum hlutnum gangandi á þennan hátt. Vissulega er þetta ekki fullkomið fyrirkomulag, það er ýmislegt sem á eftir að fínpússa hvað þetta varðar. Það er þó, að okkar mati, margfalt skárra en að láta einhverja klíku ákveða fyrir okkur hvernig á að gera hlutina.

Grunnstefna Pírata býður upp á mjög víða túlkun varðandi það hvernig á að nálgast stefnumál. Það sem Píratar bjóða fyrst og fremst fram í sveitastjórnarkosningunum felst í grunnstefnunni. Það er hugmyndafræðin sem við viljum koma inn í borgina og í þær sveitir þar sem við bjóðum okkur fram.

Grunnstefna Pírata er:

1. Gagnrýnin hugsun og upplýst stefna
2. Borgararéttindi
3. Friðhelgi einkalífsins
4. Gagnsæi og ábyrgð
5. Upplýsinga- og tjáningarfrelsi
6. Beint lýðræði
7. Sjálfsákvörðunarréttur

• About
• Latest Posts

Arnaldur Sigurðarson

Ég er nemi við Háskóla Íslands að læra félagsfræði og fjölmiðlafræði. Ég er alþjóðabarn sem ólst upp á Íslandi, Danmörku og Frakklandi. Þegar ég bjó í Frakklandi var ég í breskum, alþjóðlegum skólaþar sem ég kynntist börnum og hugmyndum frá mörgum mismunandi og ólíkum löndum. Frá því að ég var barn hef ég verið mikill vísindanörd. Ég kynntist internetinu 1995 og hef varla hætt að nota netið síðan. Ég bauð mig fram á lista Pírata í síðastliðnum Alþingiskosningum og var þá í 5. sæti í Reykjavíkurkjördæmi suður. Einnig sit ég í stjórn Young Pirates of Europe. Á síðasta ári tók ég það að mér að vera frambjóðandi til borgarstjórnarkosninga fyrir hönd Pírata og var þar í 4. sæti. Í kjölfarið tók ég við sæti sem áheyrnarfulltrúi í skóla- og frístundaráði.

Latest posts by Arnaldur Sigurðarson (see all)

• Berjumst gegn hatri með tjáningarfrelsi - 14/01/2015
• Veraldlegri jól takk - 12/12/2014
• Höfundarréttur og þungarokk - 24/11/2014