Guðlast

Fyrir nokkrum árum eyddi ég mörgum mánuðum í að lesa Biblíuna. Þar er margt skrýtið og skondið, ljótt og leiðinlegt, fallegt og fyndið. Þegar ég var komin nokkuð áleiðis ákvað ég að gera óformlega könnum á því hversu margir þeirra sem ég hitti á götum úti hefðu lesið hana. Þegar upp var staðið hafði ég spurt tæplega fjögurhundruð mann (371). Þetta var fólk á öllum aldri, strákar og stelpur, menn og konur, karlar og kerlingar. Niðurstaðan kom mér verulega á óvart vegna þess að þjóðin er sögð kristin og Biblían er grundvallarrit  trúarinnar á Jehóva, guð, Krist. Algengasta svarið var nei. Þar næst kom nei, en ég hef lesið biblíusögur (sögur valdar til útgáfu af trúboðum og kenndar í barna- og unglingaskólum í áratugi). Þriðja algengasta svarið var: Ég hef flett upp í henni. Fjórir höfðu lesið hana „svo til alla“.

Nú hefur það gerst að Illugi Jökulsson, blaðamaður og rithöfundur, hefur fengið „Frjálsar hendur“ í Ríkisútvarpinu. Þar fræðir hann kristna samlanda sína um Biblíuna  með því að lesa upp úr henni orðrétt kafla og velta vöngum yfir innihaldinu. Þetta heitir að fræða, vekja máls á viðfagsefninu, hvetja til umræðu.

Og umræðan hófst. Guðfræðiprófessor tók til máls: „ … nú hefur Illugi Jökulsson aftur fengið frjálsar hendur við val á ritningartextum og heimfærslu þeirra … og hjakkar því sífellt í sama farinu í þeirri viðleitni sinni að draga upp sem allra verstu mynd af kristindómi og gyðingdómi.“ „Það væri því ekki úr vegi fyrir ríkisútvarpið … að sjá til þess að valið á ritningartextum væri í einhverju sambandi við hefðir og akademísk vinnubrögð …“

Prestum líkar samræðulist af þessari sort. Og sést af því að þetta las aflagður biskup og „lækaði“ það og síðan að halarófa vígðra guðsmanna þjóðkirkjunnar. Þeir eru sammála prófessornum. Vilja banna frjáls skoðanaskipti. Þeir vilja ritskoða orð annarra. Einkum þeirra sem velta orðum Biblíunnar fyrir sér með öðrum hætti en þeir vilja að gert sé. Það er ekkert nýtt. Þannig hafa þeir unnið í þúsund ár og lengur.

Sunnudagsprestur Útvarpsins skammaðist yfir frjálsum orðum inni í eldhúsi hjá mér á milli klukkan 11 og12. Þegar hann fullyrti að þeir sem eiga gott trúarlíf verði langlífari en aðrir menn, og sagðist hafa þetta úr könnun sem hann greindi ekki nánar frá, fór ég út að ganga. Þegar ég kom heim aftur bárust mér ámótleg hljóð að innan. Ég hélt ég að eitthvað skelfilegt hefði komið fyrir mitt fólk. En svo var ekki, sem betur fer; útvarpspresturinn var að tóna inni í eldhúsi og undir lagleysunni varð pistillinn til. Í heilu lagi. Vitrun að hætti Biblíunnar? Gáið að því, lesið hana. Alla. Frá upphafi til enda.