Úlfar Þormóðsson 06/12/2014

Grunnstoð

 

 

Það efast fáir um gildi Ríkisútvarpsins. En þeir eru háværir sem það gera og „fara með þrugl og þylja skæting“ svo vitnað sé til orða Haralds Bessasonar í ágætisbókinni Bréf til Brands. Í ónotaliðið er nú kominn fremstur í flokk nýkjörinn aðalritari Sjálfstæðisflokksins og dýrasti þingmaður þjóðarinnar.

Hálfviti

Menningarlegt hlutverk Ríkisútvarpsins er ótvírætt. Nægir þar að vitna til þess dýrðarsafns af tónum og töluðu orði sem það hefur sent út og varðveitir. Yfirburðir þess eru augljósir og má benda efahyggjumönnum á að bera saman dagskrá þess og annarra útvarpsstöðva. Upplýsingagildið er verulegt. Skemmtanagildið fer sjálfsagt á milli mála. Þar sýnist sitt hverjum og ekki við öðru að búast.

 

Helst eru það fréttir og fréttaskýringaþættir sem pirra frjálshyggjuna. Fylgjendum hennar þykja þessir dagskrárliðir mengaðir af vinstri villu. Sem þeir ekki eru að dómi vinstri manna, sem oftar en ekki þykja þeir heldur hægrisinnaðir. Nefndir dagskrárliðir eru gagnrýnir og oft ágengir. Þeir skýra mál. Þess vegna eru þeir nauðsynlegir til þess að hlustendur geti myndað sér sjálfstæðar skoðanir.

En hvað myndi að gerast ef ekkert væri Ríkisútvarpið?

Án nokkurs vafa spryttu upp margar litlar útvarpsstöðvar í fyrstunni. Vanburðugar til að vinna áreiðanlegt útvarpsefni. Síðan myndi þeim fækka og til yrðu tvær til þrjár öflugar stöðvar til viðbótar við 365 miðla. Þær yrðu í eigu peningamanna. Útgerðar-Mogginn myndi gera enn eina tilraun til þess að reka útvarp/sjónvarp, kaupmenn aðra, fjárplógsmenn og gróðabrallarar þá þriðju. Allar þessar stöðvar myndi að sjálfsögðu þjóna eigendum sínum, flytja fréttir af þeim frá sjónarhóli þeirra og gæta  hagsmuna þeirra í hvívetna. Sérhagsmunablokkir myndu þannig móta skoðanir landsmanna og stýra þeim. Þjóðin yrði að andlegum dindlum því að hlutlausar fréttir og gagnrýn umræða myndu heyra sögunni til.  Um þetta höfum við dæmi úr sögunni, sem meðal annars eru verðveitt í safni Ríkisútvarpsins.

Stór þáttur í því að vera sjálfstæður einstaklingur með frjálsa hugsun er að hafa óheftan aðgang að upplýsingum og menningu, fornri og nýrri. Þess vegna eigum við, sem viljum ráða nokkru um okkar eigið líf, að verja Ríkisútvarpið fyrir atlögum frjálshyggjunnar og efla það.

Úlfar Þormóðsson
Latest posts by Úlfar Þormóðsson (see all)
Flokkun : Pistlar
0,727