G. Pétur Matthíasson 29/03/2014

Fjöldi fólks á fimmta fundi

GPM_1238 minniÞað er ekkert lát á mótmælunum á Austurvelli á laugardögum. Það mættu örugglega um 2-3000 manns á Austurvelli í dag. Löggan sagði 1600 en líklega er hún að telja á slaginu klukkan þrjú. Einsog ég þá eru nú örugglega fleiri sem eru alltaf aðeins seinir fyrir.

En ræðuhöld voru góð að vanda í dag. Ásdís, Smári og Stígur voru með þetta allt á hreinu, enda er krafan réttlát og sanngjörn, við viljum fá að kjósa, við viljum ráða okkar framtíð sjálf og höfnum því að misvitrir pólitíkusar loki dyrum fyrir okkur og framtíðinni.

Fólk lætur engan bilbug á sér finna þótt þingsályktunartillagan um að slíta viðræðum sé komin í nefnd og sumir halda að þar muni hún sofna. A.m.k. fram yfir sveitarstjórnarkosningar.

Rétt er að benda á að það getur hver sem er skilað inn umsögn á netfangið nefndasvid@althingi.is og um að gera að sem flestir láti álit sitt í ljós á tillögunni. Það er góð viðbót við það að mæta á Austurvöll að láta skoðun sína í ljós með umsögn.

Málinu verður að minnsta kosti haldið vakandi því það er fundur á laugardaginn kemur og við munum ekki láta stjórnmálamennina gleyma þessu. Þetta er of stórt mál til þess; fyrir nú utan að menn eiga ekki að komast upp með að svíkja kosningaloforð sín, því ef þeir komast upp með það núna þá verður ekkert mark takandi á neinu sem þeir segja. Sumum finnst það nú reyndar eiga alltaf við, en þessi svik eru svo stór og svo augljóslega brotin vitandi vits og með svo lélegri og aumri röksemdafærslu að leitun er að öðru eins. Og því eru líka viðbrögðin einsog þau eru. Hrokinn er svo kapítuli útaf fyrir sig.

En svo eru það kjósendur sem ráða á endanum, þannig að þegar upp er staðið þá verður það minni þeirra sem ræður för eftir þrjú ár. Og ljóst að rúmlega 53.000 manns munu muna.

En þá ættu stjórnmálamenn líka að vita að netið og herra Google gleyma engu.

Flokkun : Pistlar
0,761