G. Pétur Matthíasson 07/04/2014

Erum við með nógu þroskað lýðræði?

GPM_1329 (minni)Mál málanna í dag er auðvitað skýrsla Alþjóðamálastofnunar Háskóla Íslands um aðildarviðræður við Evrópusambandið. Skýrslan er ein allsherjar sönnun þess að það er gagnstætt öllum hagsmunum Íslands að slíta aðildarviðræðum við Evrópusambandið. Og það er niðurstaðan fyrir alla, líka þá sem eru á móti. En þeir sjá það auðvitað ekki þannig.

Það er nokkuð til í því sem kjaftaskurinn Jónas Kristjánsson segir að skýrslan sé loftárás sannleikans. Illugi Jökulsson teiknaði líka í dag upp þessa mynd, sem segir allt um málið hjá fjölmiðlum sem búið er að sýna fram á að segja fleiri neikvæðar fréttir af ESB en jákvæðar. En ekki í dag.

Og að öllu jöfnu, í þroskuðu lýðræðisríki, með þroskaða og upplýsta og vel þenkjandi stjórnmálamenn, yrði þessi tillaga um að slíta viðræðunum einfaldlega tekin af dagskrá nú þegar. Menn kæmu  með yfirlýsingu um það strax á morgun, t.d. að loknum ríkisstjórnarfundi (ef SDG er á landinu) að hætt hefði verið við þingsályktunartillöguna.

Í þroskuðu lýðræðisríki væri líka tekið mark á 53.402 undirskriftum og menn myndu boða til þjóðaratkvæðagreiðslu um framhald viðræðna. Nema menn væru svona alvöru og myndu einfaldlega boða áframhald viðræðna og sleppa þjoðaratkvæðagreiðslunni.

Niðurstaða skýrslu Alþjóðamálastofnunarinnar er þannig að það er stærsta hagsmunamál Íslands að slíta ekki viðræðunum og halda áfram að vera umsóknarríki og þá er náttúrulega líka eðlilegast að halda áfram viðræðum. Einfalt. Ef ríkisstjórnin treystir sér ekki til þess, þá tekur hún bara mark á Illuga.

En auðvitað hafa nei-sinnar alla tíð óttast þetta sem kemur fram í skýrslunni. Það er hægt að semja, það er hægt og jafnvel frekar auðvelt að semja um fisk, það er hægt að fara inn í gamlar sérlausnir í landbúnaði, það er hægt að klára málið frekar hratt og það er hægt að komast í ERM II skjól með krónuna strax og taka upp evruna á 2-3 árum. Allt er þetta hægt og svo miklu meira. Það er búið að semja um sérlausnir nú þegar. Og það óttast nei-sinnar.

Það er nefnilega þannig að það ríkir velvilji í garð Íslands innan Evrópusambandsins; núna, almennur velvilji, hvað sem síðar verður. Og þess vegna liggur sumum á að slíta, af því að núna er nefnilega ágætislag að ná góðum samningum við Evrópusamandið, aðildarsamningi sem yrði jafrétthár — lagalega séð — sáttmálum ESB.

Það sem nei-sinnar óttast samt allra mest er að með samningi á þeim nótum sem samkvæmt skýrslunni væri hægt að ná, þá myndi þjóðin segja já við slíkum samningi.

Og auðvitað myndi þjóðin segja já.

Hver myndi ekki segja já við lægri vöxtum, minni verðbólgu, stöðugleika í atvinnulífinu, margföldum möguleikum á erlendri fjárfestingu, margförldun á samskiptum fólks á öllum aldri við önnur Evrópuríki? Hver myndi ekki segja já við auknum neytendarétti, já við eðlilegri póstverslun, já við útlendum ostum og öllu því?

Hver myndi ekki segja já við því að taka þátt í framtíðarákvörðunum Evrópusambandsins frá því að þær eru hugmynd í stað þess að samþykkja þær bara á kvöldfundum á Alþingi?

Hver myndi ekki segja já við íslenskum framkvæmdastjóra Evrópusambandsins, við 6 þingmönnum frá Íslandi, við setu við borð ráðherranefndarinnar og leiðtogaráðsins? Hver myndi ekki segja já við að rödd Íslands myndi heyrast við borðið, með 28 öðrum fullvalda og sjálfstæðum ríkjum? Þar sem við eigum heima þótt litlir séum.

En erum við í þroskuðu lýðræðisríki?

GPM_1313 (minni)

Flokkun : Pistlar
1,311