G. Pétur Matthíasson 07/05/2016

Er þjóðinni viðbjargandi?

Einhverra hluta vegna voru mótmælum laugardagsins slegið á frest rétt fyrir klukkan tvö. Fáir voru mættir á Austurvöll og gengu svo tvo hringi í kringum Alþingishúsið fyrir siðasakir. Seinni hringurinn fór í gegnum falin fjársjóð í Reykjavík sem er Alþingisgarðurinn (en það er nú annað mál).

Ætlar fólk bara að sætta sig við þetta allt? Panama-skjölin sem sýna gjörspillt land? Sem sýnir gjörspillta stjórnmálamenn og fjölskyldur þeirra. Því meira sem kemur fram um fjármálaráðherra og hans slekt, því meiri tengingar við aflandsfélög, því meira sem vitað er um að Engeyingar eru Aflendingar, því meira eykst fylgi Sjálfstæðisflokksins. Og er það bara í lagi?

Fylgi Framsóknarflokksins eykst líka. Nú er í lagi að hafa forsætisráðherra sem segir að það sé nú erfitt að peninga á Íslandi. Og allt það. Syndaaflausnin felst í því að vera minna hrokafullur en sá sem var á undan.

Og enn er ekki búið að ákveða kjördag. Enn er ekki búið að ákveða hvaða fáu mál þarf í raun að afgreiða. Eða sumum finnst það. Mér finnst eðlilegt að kjósa strax og afgreiða svo þau mál sem þarf að afgreiða. Það er bara ekkert mál, lýðræðið er mikilvægt og það er ekki stórmál að kjósa strax, það er stór mál að gera það ekki.

Svo leggur fjármálaráðherrann fram fimm ára ríkisfjármálaáætlun sem er áætlun um áframhaldandi niðurskurð. Og það er líka bara í lagi. Fylgið eykst.

Og forsetinn okkar. Hvað á nú að segja um það. Rífandi fylgi hjá honum þrátt fyrir að hann er uppvís að því að ljúga aftur og aftur. Í síðustu kosningabaráttu sagði hann t.d. að hann biði þjóðina um að virða það við sig ef hann nú hætti áður en kjörtímabilinu lyki. Þegar þau orð féllu ekki í góðan jarðveg þá bara neitaði hann því að hafa nokkrum sinn sagt þetta. Samt var það allt til á upptöku. Kristaltært. Hann laug því líka að Svavar eignmaður Þóru Arnórs hefði búið til einhverja frétt á RÚV gegn sér um þetta. Ekki nóg með því að hann lygi og afneitaði eigin orðum hann sakaði Svavar um að nota það gegn sér á RÚV. Það var líka lygi hjá honum og jafnvel eftir að bent var á að sú frétt hefði nú verið á Stöð 2 og Svavar enga frétt sagt af forsetakosningum hélt Ólafur Ragnar áfram að halda þessu fram. Vitandi betur. Hann bara laug. Og fylgið jókst og jókst og jókst. Lygarinn vann. Og enn lýgur hann.

Við erum með fjármálaráðherra sem er tengdur aflandsfélögum þvers og kruss. Skyldmenni hans hafa nýlega keypt Borgun og fá kaupverðið (sem þeir þess vegna þurfa aldrei að borga sjálfir, (enda virðast viðskiptamenn á Íslandi aldrei vera borgunarmenn fyrir einu eða neinu) þeir fá kaupverðið margfalt til baka á örfáum mánuðum í gegnum arð og virðisauka vegna VISA. Hvort sem Bjarni Ben kom nálægt því eða ekki þá er sú sala slík spilling að stjórnmálamaður sem væri alveg saklaus af öllu væri samt ekki sætt í embætti, vegna skyldleikans eins. Samt situr hann enn og verður hrokafyllri með hverjum deginum. Og alveg sama hversu aukin tengsl koma í ljós við aflandsfélög því meira eykst bara fylgið og hrokinn. Ja svei.

Er ekki komið nóg?

Ef þjóðin vill þetta hinsvegar, hvað er þá til ráða? Flytja úr landi?

Flokkun : Pistlar
0,827