G. Pétur Matthíasson 05/04/2014

Ekkert slakað á klónni á Austurvelli

GPM_1325 (minni)Það voru um 2000 manns sem mættu á Austurvöll í sjötta sinn á laugardagseftirmiðdegi og hlustuðu á hreint frábærar ræður. Einar Kárason reið á vaðið, síðan Guðrún Pétursdóttir og loks Benedikt Jóhannesson sem leiftraði af kímni allan tímann.

Einar fór yfir söguna, kröfuna um herinn burt og Ísland úr Nató og hvernig hlutirnir hefðu nú  snúist á haus þegar þeir sem mest töluðu áður um nauðsyn þátttökunnar í Nató væru nú allra mest á móti samvinnu vestrænna lýðræðisríkja.

Guðrún var hvöss og ákveðin og sagði að það mætti ekki slaka á klónni varðandi aðhaldið að stjórnarherrunum og það stæði heldur ekki til, mætingin á Austurvelli sýndi það.

Benedikt gerði stólpagrín að sínum samflokksmönnum, sem eru það ennþá, en óvíst hvað það verður lengi. Og kíminn sagði hann nýjan flokk verða stofnaðan, eða ef hann stofnaði flokk þá yrði það nýr flokkur. En hafði áður bent á að ef mönnum þætti fátt á Austurvelli í dag þá væri skýringuna að finna í því að það væri flokksráðsfundur Sjálfstæðiflokksins í Valhöll og því margir vanabundnir fundarmenn uppteknir.

En fólk lætur engan bilbug á sér finna, stemmingin er góð og verður bara betri og ræðurnar eru meira en þess virði að verja tæpum klukkatíma á viku á laugardegi.

Nú verður reyndar gert hlé fram yfir páska, en mótmælendur munu þá mæta tvíelfdir til baka, ef þess reynist þörf. Það er undir stjórnmálamönnunum komið.

Þeir geta notað páskana til að lesa umsagnirnar um þingsályktunratillöguna um slitin, sem þeir eru svo löngu komnir í ógöngur með.

GPM_1327 (minni)

Flokkun : Pistlar
0,893