Ég lýsi hér með yfir stríði gegn jólunum

Því hefur lengi verið haldið fram, þá sérstaklega í fjölmiðlum vestanhafs, að veraldlega sinnað fólk hái stríð gegn jólunum sem verði verra og verra með hverju ári. En hver gæti verið skýringin á því að við sem erum í veraldlegri kantinum séum orðin meira en svolítið þreytt á „kristnu” jólahátíðinni? Ég hef oft verið kallaður Grinch eða Trölli sem stal jólunum. Ég gleðst lítið yfir þessum tíma árs og yfirleitt finnst mér hann bara erfiður og stressandi. Það gæti haft eitthvað með það að gera að rétt eins og Trölla finnst mér jólin hafa glatað öllu því sem jólin ættu að snúast um, en það er að eiga góðar stundir með vinum og ættingjum.

Jólin eru orðin að neysluhátíð sem tekur sífellt yfir stærri hluta af árinu. Ég hef það fyrir venju að geta mér til um það hvenær jólaauglýsingarnar hefjist, en þær getgátur rætast oftar en ekki. Það kom mér lítið á óvart að spáin mín frá því fyrra rættist þegar ég rakst á auglýsingu frá Rúmfatalagernum um jólaskraut núna í lok september. Ég vil ekki hljóma of bitur og tilkynni því strax að ég hef ekkert á móti því að fólk haldi upp á jólin og versli eins og vitleysingar. En, í alvörunni, getum við ekki farið að slaka aðeins á með það hversu lengi þetta endist og hversu stóran part af árinu þessi hátíð er farin að gleypa? Ég vil svo sannarlega ekki hafa rétt fyrir mér með að þetta byrji um miðjan september á næsta ári. Á endanum mun þetta einfaldlega gleypa allt árið og hvað er það nákvæmlega sem verður sérstakt eða skemmtilegt við jólin ef þau eru í gangi allann ársins hring?

Ég er farinn að hallast að því að ég þurfi að gera hræðsluáróðurinn vestanhafs að veruleika og lýsa yfir formlegu stríði gegn jólunum. Kannski er það eina leiðin til þess að fá fólk til þess að átta sig á því hversu absúrd þessi hátíð er að verða. Hátíðin er bara sérstök ef hún á sér stað einu sinni á ári en ekki allan ársins hring. Ef það væri hægt að stokka upp jólalögunum, þannig að þau hætti að hljóma eins og dagur í Groundhog day, væri það líka fínt. Þá myndi búðarstarfsfólkið okkar kannski halda geðheilsunni aðeins lengur.

• About
• Latest Posts

Arnaldur Sigurðarson

Ég er nemi við Háskóla Íslands að læra félagsfræði og fjölmiðlafræði. Ég er alþjóðabarn sem ólst upp á Íslandi, Danmörku og Frakklandi. Þegar ég bjó í Frakklandi var ég í breskum, alþjóðlegum skólaþar sem ég kynntist börnum og hugmyndum frá mörgum mismunandi og ólíkum löndum. Frá því að ég var barn hef ég verið mikill vísindanörd. Ég kynntist internetinu 1995 og hef varla hætt að nota netið síðan. Ég bauð mig fram á lista Pírata í síðastliðnum Alþingiskosningum og var þá í 5. sæti í Reykjavíkurkjördæmi suður. Einnig sit ég í stjórn Young Pirates of Europe. Á síðasta ári tók ég það að mér að vera frambjóðandi til borgarstjórnarkosninga fyrir hönd Pírata og var þar í 4. sæti. Í kjölfarið tók ég við sæti sem áheyrnarfulltrúi í skóla- og frístundaráði.

Latest posts by Arnaldur Sigurðarson (see all)

• Berjumst gegn hatri með tjáningarfrelsi - 14/01/2015
• Veraldlegri jól takk - 12/12/2014
• Höfundarréttur og þungarokk - 24/11/2014