Bótox

 

Það gengur á ýmsu innan ríkisstjórnarinnar og umhverfis hana. Það er búið að reka ræstingakonur úr opinberu starfi. Úr stjórnarráðinu. Það á að einkavæða þrifin. Og undirbúningur þrifabaðs stjórnarinnar sjálfrar stendur sem hæst. Ætlunin er að efna meira en ársgamalt loforð sem þingmönnum Framsónarflokksins var gefið um að bæta einum úr þeirra hópi í hana. Hvernig staðið verður við það og hver hlýtur hnossið á að fara leynt fram á síðasta dag.

Til þess að halda öldungadeild Sjálfstæðisflokksins góðri þarf að tryggja Hönnu Birnu áframhaldandi stjórnarsetu hvernig sem Leka-málið fer. En forysta flokksins aðhefst ekkert í því þessa dagana. Ástæðan er sú að ráðamenn hans vilja fyrst sjá hvaða manni framsókn ætlar að bæta í ráðherragengi sitt. Þeir vita sem er að það mun valda uppnámi í þingliði hennar hver fyrir valinu verður. Og það mun gefa þeim ró til þess að setja góðan stól undir varaformanninn. Þeir nýta því tímann nú til þess að sinna sínu helsta áhugamáli, einkavinavæðingu, og vinna leynt og ljóst að henni í heilbrigðis – og skólakerfinu, Fríhöfninni á Keflavíkurflugvelli og þrifamálum í stjórnarráðinu svo fátt sé nefnt.

Sjálfstæðismenn telja sig vita að þau Vigdís Hauksdóttir og Ásmundur Einar Daðason eru fallin úr náðinni hjá formanni sínum. Þau tvö vita það að vísu ekki ennþá. Formaður þeirra er nefnilega ólíkindatól þegar kemur að efndum loforða, hvað þá vilyrða. Eða þannig.

Og nú er hugmynd hans að milda ásjónu flokksins með því að gera utanþingsmann að ráðherra. Konu. Vel þokkaða, vel ættaða flokkskonu sem vinnur með honum, fyrir hann og hjá honum. Það er Lilja Dögg Alfreðsdóttir Þorsteinssonar, fyrrum borgarfulltrúa framsóknar og framkvæmdastjóra Sölunefndar varnarliðseigna, verkefnastjóri í forsætisráðuneytinu. Hvenær af þessu verður veltur á því hversu lengi í enn formanninum þykir hugmyndin góð.