Úlfar Þormóðsson 22/11/2014

Bomban

 

Innanríkisráðherra ætlaði að gera allt vitlaust vegna aðfarar vondra manna að honum (henni). Hann (hún) taldi að það væri árangursríkast fyrir sig að lauma handsprengju í hreiður ríkisstjórnarinnar. Hann (hún) tók pinnann úr og læddist síðan út um bakdyrnar. Hann (hún) tók feil á vopnum. Þetta var reykbomba og þegar búið var að ræsta kom í ljós að það eina sem skemmdist í hreiðrinu var blað með hrókeringum í ríkisstjórninni þar sem stóð skýrum stöfum að umfram allt bæri vernda innanríkisráðherrann fyrir ljótum leikjum.

James Bond

Á ónefndum stað í borginni brá ríkislögreglustjóra og forstjóra Landhelgisgæslunnar hrottalega þegar þeir sáu reykinn og ákváðu að skila norsku byssunum tafarlaust.

Þegar pinninn var tekinn úr sprengjunni lentu embættisverk nýkaraðs lögreglustjóra í Reykjavík undir smásjá persónuverndar og aldrei að vita nema umboðsmaður alþings og eða saksóknari ríkisins þurfi einnig að rýna í þau.

Annar skaði varð ekki af uppátækinu. Ríkisstjórnin hefur aldrei verið samheldnari en nú. Fylgi hennar fer vaxandi. Innanríkisráðherra hefur ekki gert neitt af sér frekar en fyrri daginn. Hann (hún) verður áfram varaformaður Sjálfstæðisflokksins og þingmaður eftir áramót. Formaður Flokksins ber fullt traust til hans (hennar) og forsætisráðherra er farinn til Hornafjarðar.

Úlfar Þormóðsson
Latest posts by Úlfar Þormóðsson (see all)
Flokkun : Pistlar
0,778