Úlfar Þormóðsson 27/10/2014

Birgðavörðurinn

 

Þegar ég var að velta því fyrir mér hvers vegna viðtal við Georg Lárusson, forstjóra Landhelgisgæslunnar vegna byssumálsins var klippt til 7 sinnum fyrir útsendingu í fréttatíma Sjónvarpsins í gærkveldi (26.10.) skaut upp í kollinum tæplega 50 ára gömlum vísuparti úr Sóleyjarkvæði Jóhannesar úr Kötlum:

 

Mikið er hún voldug

varnarbyssan þín

 

Meðal þess sem forstjórinn var inntur eftir var hvers vegna samningurinn um vopnakaupin (-gjöfina) (-sníkjurnar) væri ekki gerður opinber. Þá svaraði hann: „Ástæðan er sú að þetta er NATO-samningur og hann er stimplaður sem NATO trúnaðarmál.“

óperan stytta

Þetta þýðir með öðrum orðum að viðskipti milli NATO–ríkja mega ekki vitnast, hvorki til þjóða, þjóðþinga né ráðherra; jafnvel ekki til Björns Bjarnasonar.  NATO er leynifélag. Meira eð segja svo mikið leynifélag að hvorki ráðherra, utanríkismálanefnd þjóðþingsins né æðsti yfirmaður Landhelgisgæslunnar mega undirrita viðskiptamninga sem gerðir eru á þess vegum. Þar þarf annan að. Einhvern ósnertanlegan. Huldumann. Og hann fannst: Yfirmaður birgðamála Gæslunnar.

Birgðavörðurinn var gerður ábyrgur fyrir byssunum og skrifaði undir leynisamning Íslands/Noregs/NATO.

Okkur er sagt að 250 hríðskotabyssur séu ennþá í öryggisgeymslu á Keflavíkurflugvelli. En er það svo? Hefur einhver séð þær? Hvað eru þær margar? Hefur einhver talið þær.

Og þá hljómar aftur íslensk ljóðaklassík frá Jóhannesi úr Kötlum, að vísu ort af öðru tilefni, en skyldu:

En óvissan kveður tóra þóra:

erum við þrjátíu og tveir?

nei, við erum fjörutíu og tveir!

og hvorttveggja sverja þeir

-þeir ruglast í sinni eigin tölu

alltaf meir og meir.

Úlfar Þormóðsson
Latest posts by Úlfar Þormóðsson (see all)
Flokkun : Pistlar
0,859