… æ,æ,æ …
Kona trúði því sem ráðherrarnir sögðu um skuldaniðurfærsluna í fyrrahaust, vetur og vor. Hún sótti um að fá að nota fé af séreignasjóði sínum til þess að greiða niður húsnæðisstjórnarlán (nú heitir það víst íbúðasjóðslán) af íbúðinni sinni. Um það snerust heitu orð ráðherranna.
Síðan tók hún sig til á miðju sumri og sótti um heimild til þess arna áður en umsónarfrestur var úti.
Svo beið hún.
Á föstudaginn fékk hún tölvupóst
Frá: Leiðréttingin <no_reply@leidretting.is>
Dagsetning: 31. október 2014 kl. 17:00
Titill: Ný skilaboð á leidretting.is
Góðan dag, þín bíða ný skilaboð á leidretting.is: Höfnun frá séreignarsjóði
Þegar hún hafði áttað sig á því að hún fengi ekki að nota séreignasjóðinn fór hún að grennslast fyrir um málið því að hún vill ekki missa trú á ráðamönnum. Hún vill byggja upp traust. Og halda því.
Hjá endurskoðanda fékk hún hún að vita að lífeyrisþegar fengju ekki að nýta sér þessa leið til skuldalækkunar. Hún væri fyrir þá sem enn eru að greiða í séreignasjóð. Og þeir mættu nota það sem þeir hefðu lagt fyrir síðan í júlí á þessu ári. Ekki það sem þeir hefðu lagt fyrir áður.
„Æ, æ,“ sagði konan. „Ég hlýt að hafa misskilið þetta því að ekki fara ráðamenn að skrökva og vekja falsvonir hjá fólki.“
En ég, sem hef týnt trausti til sitjandi ráðamanna, spyr: Er þetta virkilega svona?
