Utanríkisráðherra: Engin áhrif umsóknar og viðræðna. Engin „aðlögun“ að Evrópusambandinu

Engar breytingar hafa orðið á lögum á málefnasviði utanríkisráðuneytisins vegna aðildarumsóknar og viðræðna við Evrópusambandið.

Þetta kemur fram í svari Gunnars Braga Sveinssonar utanríkisráðherra við fyrirspurn Guðbjarts Hannessonar alþingismanns.

Guðbjartur spurði ráðherrann þriggja spurninga um „aðlögun að Evrópusambandinu“:

1. Hvaða breytingar sem orðið hafa á lögum á málefnasviði ráðuneytisins eða á stofnunum þess frá 2009 má rekja til aðlögunar að Evrópusambandinu?

2. Hvaða breytingar voru eingöngu vegna aðildarumsóknar og viðræðna við ESB?

3. Hvaða breytingar urðu á sama tíma fyrst og fremst vegna aðildar Íslands að EES?

Í svari við fyrstu spurningu kemur fram að lögum um Evrópska efnahagssvæðið hafi verið breytt árið 2010 „vegna samninga við Evrópusambandið um svokallað fjármagnskerfi EES (uppbyggingarsjóður EES).“ Sama svar er gefið við þriðju spurningu.

Svar við spurningu númer tvö er stutt: „Engar.“

Guðbjartur beindi sömu spurningum til allra ráðuneyta, en önnur svör hafa ekki borist.