Ritstjórn 27/03/2014

Tryggvi ætlar að sækja um lækkun – Árni stórtapar á Helguvík

Tryggvi Þór Herbertsson, verkefnastjóri ríkisstjórnarinnar í skuldamálum, ætlar sjálfur að sækja um skuldalækkun í samræmi við tillögur sem kynntar voru í nóvember. Þetta sagði hann í samtali við morgunútvarp Rásar 2 í morgun.Tryggvi og Árni

Tryggvi sagði betri fjárfestingu og öruggari fjárfestingu ekki bjóðast enda gæti „ávöxtunin“ verið allt að 40 prósent.

Fréttablaðið greinir frá því að fyrirtækið Reykjaneshöfn hafi tapað næstum 3 milljörðum á síðustu fimm árum, þar af 650 milljónum í fyrra. Skýringin er einkum rekstur hafnarinnar í Helguvík þar sem framkvæmdir hafa verið miklar þótt verkefni séu ekki tryggð til að nýta aðstöðuna. Árni Sigfússon bæjarstjóri segir að Helguvík sé þungur baggi á bæjarfélaginu sem hafi þurft að fjármagna framkvæmdir með lántökum.

Uppsafnaðar skuldir Reykjaneshafnar nema nú um 7 milljörðum króna.

DV segir að Ólafur Johnson, eigandi menntaskólans Hraðbrautar, hafi tekið sér 6 milljóna arð úr móðurfélagi skólans í fyrra þótt rekstur hafi verið enginn, og lánað þaðan aðrar 16 til „tengdra“ aðila. Skólanum var lokað eftir svarta skýrslu Ríkisendurskoðunar og hann skuldar ríkinu enn á annað hundrað milljóna króna. Fram kom á dögunum að Ólafur hygðist hefja rekstur skólans aftur á næstunni.

Loks birtir Morgunblaðið könnun Félagsvísindastofnunar, þar sem 55 prósent Reykvíkinga segjast helst vilja Dag B. Eggertsson sem næsta borgarstjóra.

Flokkun : Efst á baugi
0,954