Styður sjávarútvegurinn þá kröfuna: Ísland úr Nató?

Fjármálaráðherrann okkar var í viðtali í dagblaði um daginn og samkvæmt eftirsögn Eyjunnar hafði þetta m.a. að segja um viðskiptabann Rússa: „Bjarni Benediktsson, fjármálaráðherra og formaður Sjálfstæðisflokksins, segir að harðar deilur um innflutningsbann Rússa endurspegli óvild í garð sjávarútvegsins á Íslandi. Það beinlínis hlakki í mönnum yfir því að þjóðin geti orðið af tugmilljarða útflutningstekjum. […] Í viðtalinu er Bjarna tíðrætt um viðskiptaþvinganir Evrópusambandsins gegn Rússlandi, þótt fjölmörg önnur ríki – til að mynda Noregur, Bandaríkin, Kanada, Japan og Ástralía – taki þátt í aðgerðunum.“ Segir á Eyjunni.

Ég held að það hlakki ekki í neinum einasta manni yfir hugsanlegu tekjutapi vegna sölu á makríl til Rússlands eða annarra sjávarafurða. En það sem fjármálaráðherrann og sjávarútvegurinn virðist ekki skilja er að velvild landsmanna í garð þessarar mikilvægu atvinnugreinar hefur minnkað stöðugt og heldur áfram að minnka við þessi síðustu tíðindi, eða öllu heldur við viðbrögðum manna í greininni við viðskipabanni Rússa. 

Óvildin eða öllu heldur minni velvilji er tilkomin vegna þess að við í þessu landi upplifum við það að örfáir menn í greininni hagnist gríðarlega, við upplifum það að fyrsta verk núverandi ríkisstjórnar var að lækka auðlindagjaldið, rentu þjóðarinnar af eigin auðlind um milljarða og milljarðatugi. Til hvers? Til þess að þessir örfáu einstaklingar gætu hagnast enn meira – ekki vilja þeir hækka kaup sinna verkamanna heldur gefa þeim íspinna í staðinn. Og stjórnvöld hygla enn þessum ríkustu einstaklingum með flestum sínum aðgerðum en hóta meira aðhaldi í velferðarkerfinu fyrir almenning. Og þá koma þeir kvótaeigendurnir og heimta meira. Er nema von að einhver óvild skjóti upp kollinu? Við – pöpullinn í landinu – upplifum það nefnilega þannig að þessar tugmilljarða króna útflutningstekjur skili sér ekkert til okkar, heldur bara til sægreifanna og að jafnvel að hluti þeirra endi á Tortólu. Það er upplifunin, við vitum fullvel að eitthvað seitlast um hagkerfið okkur öllum til góða, en það breytir samt ekki óréttlætinu sem fest í ofsagróða örfárra á auðlind okkar allra. Það þarf nú fjármálaráðherrann að horfast í augu við.

Hin meinta óvild er ekki í garð sjávarútvegsins sem slíks heldur er óvildin í garð þessara fáu sem nú koma fram og vilja að Ísland falli frá öllum grundvallarsjónarmiðum vestrænna gilda, falli frá hugmyndum okkar um sjálfstæði og fullveldi sem felst í viðurkenndum landamærum ríkja. Í raun að við yfirgefum og föllum frá samvinnu og samheldni lýðræðisríkjanna. Það er ekkert smá. En hrós fær utanríkisráðherrann fyrir að standa fast á sínu og standa með grundvallarsjónarmiðum, hann hefur orðið meiri maður fyrir vikið.

Og fyrir hvað vilja menn fórna þessu? Skammtímagróða örfárra sægreifa? Er nema von að aðeins skíni í úfinn óvildarhaus þjóðarinnar. Á að falla frá grundvallaratriðum lýðræðis og vestrænnar samvinnu fyrir innan við fimm prósent af útflutningnum? Eða fyrir jafnvel helminginn af því, af því að Rússar geta ekkert lengur flutt inn jafnmikið af makríl; allavega ekki fyrir sama verð og geta kannski ekkert borgað heldur eða eitthvað takmarkað.

Og líkt og kemur fram á Eyjunni þá er það ekki bara Evrópusambandið sem setti frekar léttar viðskiptaþvinganir á Rússa. Þetta eru Nató ríkin auk annarra. Er það þá orðin krafa sjávarútvegsins að Íslands segi sig úr Nató? Myndi sjávarútvegurinn þá taka undir þá kröfu sem uppi var áður en Bandaríkjamenn gáfu okkur fingurinn: Ísland úr Nató og herinn á brott? Ef það hentaði þeim vegna útflutningsmöguleika?

Og það eru Rússar sem eru að setja á okkur viðskiptabann, ekki Evrópusambandið, ekki Nató, ekki okkur nágrannalönd.

Svo koma stjórnmálamenn og fleiri fram og staðhæfa fullum fetum að viðskiptabann Rússa sé einhverskonar plott til að koma Íslendingum í faðm Evrópusambandsins.  Maður verður bara að vona að sendiráð erlendra ríkja hér á landi láti vera að þýða svona heilaleikfimi ESB andstæðinga sem ekki sjást fyrir því annars er viðbúið að það verði bara hlegið að okkur. Maður hreinlega óttast að ef Sacha Baron Cohen þarf að leggja Borat Sagdiyev karakter sínum frá Kasakstan þá væri hann vís til að finna upp nýjan álíka karakter frá Íslandi.