trusted online casino malaysia
Sparkhéðinn 21/04/2014

Skríllinn fær dollu

Það virðist ekki umflúið. Liverpool er að vinna Englandsmeistaratitilinn.Suarez

Það er auðvitað í góðu lagi, þannig séð. Lið Brendans Rodgers spilar flottan fótbolta og í Liverpool eru góðir leikmenn, eins og Suarez, Sturridge, Sterling og svo auðvitað Gerrard.

Suarez er hvergi húsum hæfur nema á Anfield, en Gerrard er toppmaður sem hefur haldið tryggð við sitt félag í gegnum súrt og sætt. Aðallega súrt, en líka sæta sigra í ótrúlegum leikjum eins og í bikarúrslitaleiknum 2006 og í úrslitaleiknum gegn AC Milan í Tyrklandi 2005.

Þetta verður fyrsti Englandsmeistaratitill Liverpool síðan 1990, ekki satt? Yfir síðasta titlinum hvíldi sá skuggi að Liverpool mátti þá ekki spila í Evrópu. Það var staða sem Liverpool bar sjálft fulla ábyrgð á og má rekja til harmleiksins á Heysel-leikvanginum í Brussel í maí 1985 þegar ofbeldisskríllinn sem fylgdi Liverpool-liðinu hvar sem það fór á þessum árum gekk af göflunum með þeim afleiðingum að rúmlega 30 stuðningsmenn Juventus létu lífið.

Vegna Heysel fengu hvorki Liverpool né önnur ensk knattspyrnulið að leika í Evrópu næstu ár á eftir. Það eina sem Liverpool-menn geta huggað sig við í því sambandi er að þetta bann bitnaði líklega verst á Everton sem átti sitt blómaskeið einmitt á bannárunum sem stuðningsmenn Liverpool kölluðu yfir enska knattspyrnu.

Þótt þetta sé löngu liðin tíð hefur Liverpool öll þessi ár verið ráfandi í eyðimörkinni, án Englandsmeistaratitils og hefur oftast mátt vel við una að ná sjöunda sæti í efstu deild að vori. En nú virðist eyðimörkin að baki og blómaskeið gæti verið framundan ef Suarez helst ómeiddur og tekur ekki upp á því enn einu sinni að bíta fólk.

Það sem þyrfti til þess að svipta Liverpool þessum meistaratitli úr því sem komið er væri dramatík af því taginu sem gerðist vorið 1989 – þegar eyðimerkurgangan var rétt að hefjast.

Það var þá sem Michael Thomas skoraði þremur mínútum eftir að venjulegum leiktíma var lokið og tryggði Arsenal titilinn á kostnað þeirra heimamanna á Anfield – á markahlutfalli.

Ekki svo að skilja að við vonum að þetta gerist. Skríllinn má alveg fá einn og einn Englandsmeistaratitil. Á aldarfjórðungsfresti.

Flokkun : Pistlar
1,394