Ritstjórn 09/04/2014

Skattgreiðendur bera og hafa borið kostnað vegna fjölmiðla 365. Fullyrðingar um annað eru rangar

Fréttastofa Stövar 2 keyrir nú auglýsingastiklu þar sem hún segist „vinna sína vinnu án þess að kosta ykkur skattfé.“ Þetta er ekki rétt, eins og Þórður Snær Júlíusson rekur í grein í Kjarnanum.Stöð 2

Þar er rifjað upp gjaldþrot hins gamla rekstrarfélags 365, þar sem 3.700 milljónir króna töpuðust. Meðal þeirra sem höfðu lánað félaginu fé sem tapaðist voru lífeyrissjóðir og ríkisbankinn Landsbanki Íslands.

Þá hafi Hagar fjármagnað að mestu kaup Jóns Ásgeirs Jóhannessonar á fjölmiðlum gamla rekstrarfélagsins, en Hagar eru núna að mestu í eigu lífeyrissjóðanna.

Þórður Snær nefnir einnig kostnað sem sveitarfélög bera af útgáfu Fréttablaðsins:

„Fréttablaðinu, dagblaði 365, er dreift frítt í 90 þúsund eintökum daglega. Sveitafélögin á höfuðborgarsvæðinu bera 40-45 milljóna króna kostnað vegna urðunar á dagblaða- og tímaritapappír á ári. Uppistaða þess kostnaðar er vegna Fréttablaðsins. Auk þess borgar fólk sérstaklega fyrir bláar tunnur sem eru að langstærstu leyti fylltar af Fréttablaðinu.“

Niðurstaða Þórðar Snæs er þessi: „Þetta fyrirtæki hefur kostað okkur almenning fullt af fé. Það hefur kostað lífeyrissjóðina fé, ríkisbankann Landsbankann fullt af fé og auk þess er starfsemi þess niðurgreidd með útsvarinu okkar um tugi milljóna króna á ári.“

Flokkun : Efst á baugi
0,693