Ritstjórn 07/04/2014

Sálgreining á Sigmundi Davíð: Hrokafullur, skortir samlíðan og samhygð. Vill vera blanda af Jónasi frá Hriflu og Davíð

Ástæða þess að fólk bregst verr við ýmsum ummælum Sigmundar Davíðs Gunnlaugssonar en annarra stjórnmálamanna er sú, að hann er hrokafullur og talar niður til þjóðarinnar.Hildur Eir

Þetta sagði séra Hildur Eir Bolladóttir í Sunnudagsmorgni, sjónvarpsþætti Gísla Marteins Gunnlaugssonar um helgina. Þar var rætt um þau ummæli forsætisráðherra, að margvísleg tækifæri fyrir Ísland fælust í þeim hörmungum sem að óbreyttu ganga yfir heimsbyggðina.

Séra Hildur Eir sagði meðal annars:

„Þetta er eins og að ég segði að ég sæi tækifæri í útfarabransanum. Ég fæ greitt fyrir útfarir, en ég vil ekki að fólk deyi til þess að ég fái greitt.“

Hún bætti við:

„Af hverju geta sumir sagt alls konar hluti og viðkvæma hluti án þess að fólk bregðist reitt við? Sigmundur Davíð getur það ekki, og það er vegna þess að hann kemur líka fram með hroka. Mér finnst ótrúlega erfitt að horfa upp á þennan unga forsætisráðherra, sem ég held að sé mjög klár maður í grunninn, hvernig hann talar niður til þjóðarinnar. Hann er ekki í samtali við okkur.

Og ég held að það sé þess vegna sem hann er farinn að upplifa það, að hann er kominn upp við vegg, vegna þess að allt sem hann segir – fólk bregst reitt við.

Það vantar pínulítið að hann sé samferða þjóðinni, og vantar s-in þrjú, samkennd, samlíðan og samhygð í framsetningu. […]

Þetta er bara maður á aldur við mig og mér finnst líka stundum að hann hafi ákveðið að verða einhvers konar sambland af Jónasi frá Hriflu og Davíð Oddssyni, á kolröngum tíma. Þeir voru menn síns tíma, síns tíðaranda.

Hann er af minni kynslóð og við tölum ekki svona.“

 

Flokkun : Efst á baugi
0,766