Sænski rasistaflokkurinn gæti náð lykilstöðu eftir þingkosningar. Fylgi femínista ræður miklu

Um aðra helgi fara fram þingkosningar í Svíþjóð sem gætu markað tímamót þar í landi. Hvorug hinna hefðbundnu hægri og vinstri blokka er líkleg til að fá meiri hluta, en hinum rasíska flokki Svíþjóðardemókrata er spáð mikilli fylgisaukningu.

Hann gæti því komist í lykilaðstöðu í sænska þinginu eftir kosningar.

Þessu lýsir Jón Daníelsson í yfirgripsmikilli grein í Herðubreið.

Jón skrifar meðal annars:

„Það sem er spennandi fyrir þessar kosningar er aldrei þessu vant alls ekki munurinn á pólitísku fylkingunum tveimur. Sú rauðgræna er nefnilega mun stærri og allt stefnir í tiltölulega stóra vinstrisveiflu í kosningunum. Á hinn bóginn virðist ljóst að Svíþjóðardemókratarnir fái kringum 10% atkvæða og vinstrisveiflan þarf því að verða mjög stór til að rauðgrænu flokkarnir fái raunverulegan meirihluta.

Fá hvorug blokkin hreinan meirihluta í þinginu komast Svíþjóðardemókratar í algera lykilstöðu þegar í odda skerst milli fylkinga. Svo dæmi sé tekið gætu borgaraflokkarnir í stjórnarandstöðu lagt fram sitt eigið fjárlagafrumvarp og Svíþjóðardemókrötum væri þá í lófa lagið að greiða því atkvæði. Við slíkar aðstæður væri ný, rauðgræn ríkisstjórn auðvitað fallin.“

Jón bætir við:

„Frá sjónarmiði áhugamanna um sænsk stjórnmál er reyndar fjöldamargt fleira sem vekur athygli […]. Einna stærstu tíðindin eru þau að sænskir jafnaðarmenn virðast ekki ná 30% fylgi. Það verður þá minnsta fylgi flokksins síðan 1911. Samt stefnir allt í að Stefan Löfven verði forsætisráðherra.

Og það má líka kalla talsverð tíðindi ef Gudrun Schyman, stofnandi og helsta talskona Femínista kemst inn á þing, nú 68 ára að aldri.“

Grein Jón Daníelssonar má lesa hér til hliðar.