Ritstjórn 21/12/2015

Ritstjóri Herðubreiðar: Hættum að blekkja börnin okkar. Í dag eru hin raunverulegu jól

Jesús fæddist ekki 24. desember. Þau ósannindi, sem kirkjan ætlast til þess að börnin okkar trúi, eru hættulegri en trúin á jólasveinana.Menorah

Þetta er einn kjarni greinar sem ritstjóri Herðubreiðar, Karl Th. Birgisson, skrifar á vefinn í dag. Hann minnir líka á að jólin eigi sér uppruna í forni hátíð til að fagna vetrarsólstöðum og þar með rísandi sól, hinn 21. desember.

Karl vitnar í fyrrverandi biskup, Karl Sigurbjörnsson, sem sagði að jólasveinatrúin væri leikur, en jólaguðspjall biblíunnar „heilagur sannleikur“.

Ritstjórinn rifjar upp ýmis ólíkindi í jólaguðspjallinu og nýja testamentinu, svo sem eingetnað Jesúsar og ýmis kraftaverk hans:

„Þessum fantasíum og furðusögum stefnir kirkjan semsagt gegn Grýlu og jólasveinunum – að sú skringifjölskylda sé blekking, en historíur biblíunnar hvorki meira né minna en heilagur sannleikur.

Þó höfum við orð tugþúsunda fólks fyrir því að jólasveinarnir séu til. Af þeim hafa verið sagðar sögur í margar aldir, af vel meinandi og óljúgfróðu fólki, framburður þess er stabíll og æsingalaus – jafnvel það sem dómstólar myndu kalla trúverðugur – og fæstar eru frásagnirnar eins ævintýralega fjarstæðukenndar og sögurnar af Jesúsi. Hvað þá af fjöldamorðingjanum og fantinum, pabba hans.

Svangur utangarðsmaður að stela sér bjúga eða fljúgandi lúðrasveitin Svanur með vængi? Sorrí – jólaveinarnir vinna 14-2.“

Karl minnir á að meintur guð kristinna, gyðinga og múslima sé einn og hinn sami og varar við hættu sem steðjar af hindurvitnum:

„Fólk er tilbúið að deyja og drepa fyrir mörg þúsund ára gamlar þjóðsögur af Jahve/Jehóva/Allah – sem er allt sami kallinn eða kellingin – og ólíkar túlkanir misbrenglaðs fólks á þeim. Þessi fásinna og fjöldahystería, ásamt með skelfilegri misskiptingu veraldlegra gæða, er helzta ástæða ófriðar, átaka, morða og mannskemmda á okkar tímum.“

Karl leggur til að við tökum aftur upp þann sið, að „óska hvert öðru gleðilegra jóla hinn 21. desember. Það er þó satt og rétt, ef eitthvað er satt og rétt, því að ekki ljúga himintunglin.“

Grein Karls má lesa hér.

Flokkun : Efst á baugi
1,480