Oddviti Framsóknar: Vatnsmýrin verður eins og draugahverfi í Abú Dabí. Félög megi ekki eiga íbúðir
Oddviti Framsóknarflokksins í Reykjavík, Sveinbjörg Birna Sveinbjörnsdóttir, hefur útskýrt betur hugmyndir sínar um hvað verður um Vatnsmýrina ef flugvöllurinn fer þaðan.
Hún hefur áður sagt að það séu einkum erlendir kröfuhafar sem þrýsta á um að flugvöllurinn fari svo að þeir geti fjárfest á svæðinu.
Í viðtali í útvarpsþættinum Harmageddon í gær sagði hún viðbúið að útlendingar myndu byggja þar húsnæði, sem stæði svo meira og minna autt allt árið.
„Hverjir ætla að búa þarna? Ekki hefur þú haft efni á að kaupa þér íbúð í Skuggahverfinu? Og hverjir hafa efni á að kaupa sér íbúð í Skuggahverfinu? Það eru ekkert rosalega margir. […] Skoðaðu hafnarbakkann núna. Ég myndi halda að þriggja herbergja íbúð þar væri í kringum fjörutíu milljónir. Hverjir eru að fara að kaupa þessar íbúðir? Það eru ekkert rosalega margir á Íslandi […] Ég held að það sé kannski fólk frá útlöndum sem er að fara að kaupa þessar íbúðir.
Hefur þú farið til dæmis til Dúbaí eða Abú Dabí, þar sem eru raunverulega bara svona draugahverfi þar sem erlendir aðilar hafa fjárfest í íbúðum og þær standa bara auðar meginhluta ársins? Er það miðbærinn sem við viljum byggja?“
Sveinbjörg virðist einnig vera mótfallin því að rekin séu leigufélög á markaðnum:
„Það er allt í lagi þó að þú kaupir þér eina íbúð eða tvær og ætlir að leigja, en að það séu félög á markaði með það að byggja og selja og eiga og reka íbúðarhúsnæði er mjög óeðlilegt. [… Félög] geta fjárfest í skrifstofuhúsnæði og iðnaðarhúsnæði og verslunarhúsnæði, en þau fjárfesti ekki í íbúðarhúsnæði.“
Viðtalið í heild er hér.
- Nú ertu (endanlega) búinn að missa það, Brynjar - 20/02/2022
- Þegar streðinu lýkur – Guðni Már (og mamma) - 03/01/2022
- Afplánunin - 02/12/2021