Ritstjóri Herðubreiðar 10/05/2014

Oddviti Framsóknar: Umræða um gjaldeyrishöftin snýst í raun og veru um flugvöllinn. Hefur ekki kynnt sér frumvarp um skuldaniðurfærslu

Nýkynntur oddviti Framsóknarflokksins í Reykjavík, Sveinbjörg Birna Sveinbjörnsdóttir, telur að umræða um gjaldeyrishöftin snúist í raun og veru um Reykjavíkurflugvöll. Eða jafnvel öfugt – að þrýstingur á að flugvöllurinn fari sé afleiðing gjaldeyrishaftanna.Sveinbjörg Birna

Þetta má lesa í viðtali við hana í Reykjavík vikublaði sem kom út í dag.

Þar er Sveinbjörg spurð um húsnæðismál í borginni og segist hún vilja að borgin byggi sjálf íbúðarhúsnæði, frekar en verktakar:

„Núverandi meirhluti segist vera að beita sér fyrir byggingu 3500 íbúða en það eru allt verktakar sem eru að byggja þetta. Mig langar að kalla eftir því hvað Reykjavík ætlar að byggja.“

Síðar í þessum hluta viðtalsins segir hún:

„Þessi umræða um gjaldeyrishöftin snýst raunverulega um flugvöllinn. Þetta er ákveðin þrautalending fyrir krónueigendur. Það er þess vegna sem er svona mikill þrýstingur á að flugvöllurinn fari.“

Spurð frekar um þetta svarar Sveinbjörg:

„Ég ætla ekki á meðan gjaldeyrishöftin eru að veita fjárfestum það svigrúm að fjárfesta þarna. Þeir geta fjárfest með mér í úthverfum og styrkt Reykjavík.“

Skilja má þessi ummæli þannig að það séu fjárfestar sem þrýsti á um flutning flugvallarins vegna þess hversu fáa aðra fjárfestingarkosti þeir hafa í gjaldeyrishöftum. Og að umræðan um flugvöllinn myndi hjaðna ef gjaldeyrishöftum yrði aflétt.

Sveinbjörg er einnig spurð um loforð Framsóknarflokksins um skuldaniðurfellingu:

„Ég er að koma heim úr fjögurra vikna fríi og þegar ég fór út þá var ekki búið að leggja fram þetta frumvarp. Ég er ekki búin að sjá þetta frumvarp. Ég hef ekki kynnt mér þetta nákvæmlega.“

Og hún bætir við:

„Ég er ekki búin að kynna mér frumvarpið og ekki búin að sjá drögin en ég fór vel yfir tillögurnar sem komu fram og þær voru ekki í samræmi við mínar væntingar.“

 

 

 

Flokkun : Efst á baugi
2,405