Nú er maður alveg hættur að skilja

Hvað er í gangi? Varðandi loforðið mikla, heimsmetið, skuldaniðurfellinguna? Þetta átti að vera leiðrétting á forsendubresti. Það var í raun það eina sem réttlætir þessa aðgerð, að það hafi orðið þannig óréttlæt gagnvart okkur, fólkinu í landinu, að það þurfi að bæta. Reyndar hefur líka verið bent á óréttlætið sem felst í þessari leiðréttingu sjálfri, leigjendur og allskonar fólk sem ekki fær leiðréttingu á sínu foresendubresti eða niðurfellingu höfuðstóls af því að það er enginn höfuðstóll en það er önnur saga.

Loforðið gekk út á það að hér hefðu forsendur þannig breyst að þær væru í raun sem náttúruhamfarir og það bæri að leiðrétta. Bent var á að sanngjarnt væri að sú leiðrétting væri borguð af hrægömmum svokölluðum og talað um 240-300 milljarða í því samhengi sem væri ekki mikið í því að svigrúmið í heild sinni væri einir 800 milljarðar króna.

Síðan kemur í ljós hjá forsætisráðherra að það hafi aldrei staðið til að setja þessa upphæð alla í leiðréttinguna, því hann hefði alltaf haldið því fram að það væri miklu ódýrara að gera þetta en andstæðingar hans héldur fra. Það kostaði bara 80 milljarða króna, hann væri búinn að reikna það allt út. Látum liggja á milli hluta að svo megum við náðarsamlegast nota 70 milljarða af okkar eigin sparnaði og skatttekjum ríkisins í framtíðinni til að lækka höfuðstólinn líka.

Gott og vel, þetta kostar þá bara 80 milljarða og látum líka liggja á milli hluta að þeir peningar eiga ekki að koma frá hrægömmunum heldur á að skattleggja þrotabú gömlu bankana. Látum líka liggja á milli hluta að sjálfum finndist mér að það mætti finna leiðir til að nota 80 milljarða skatttekjur sem myndi nýtast þjóðinni, allri þjóðinni, betur en þessi leiðrétting. En það er önnur saga.

Nú kemur samt allt í einu upp úr dúrnum að ef allir sækja um sem rétt eiga á þessari leiðréttingu, það eru jú bara sumir sem eiga þann rétt, menn verða jú að skulda, eða hafa skuldað, en ef allir sækja um þá þarf að lækka upphæðina til hvers og eins. Lækka hana því hún má ekki fara upp fyrir 80 milljarðana.

Bíddu nú við, en er þá bara ekki dýrara að leiðrétta en forsætisráðherra hélt fram? Og á það að koma niður á leiðréttingunni? Afhverju er þá skatturinn á þrotabúin ekki hækkaður til samræmis? Fundu menn ekki einhverja sanngjarna leið til að finna út sanngjarna leiðréttingu, eða fundu menn bara töluna fyrst?

Það er ekki heil brú í þessu.

En það er ekki búið enn. Þetta sagði reikningsmeistari leiðréttingarinnar en fjármálaráðherra bætti um betur og sagði að það yrði ekki neitt greitt út fyrr en þessir 80 milljarðar væru tryggir í húsi.

Bíddu, hvað þýðir þetta? Þrotabúin fara alveg örugglega í mál út af þessum skatti því allir eru sammála um að það sé alls ekkert öruggt að hann standist lög. Slík málaferli taka langan tíma, einhver ár líklega. Og hvað þá? Þá er ekkert öruggt með að þessi peningar komi í hús til langframa. Þrotabúin verða að borga en ef ríkið tapar þá þarf að borga til baka. Og hvað þá, ætlar Bjarni Ben að bíða þar til dómsmálum líkur? Það er í raun ekki hægt að skilja hann öðruvísi. Það er viss skynsemi í því, en það var ekki þannig sem loforðin hljómuðu. Eða var það nokkuð?

Hvenær kemur þá leiðréttingin mín og kakan?

Ekki tók svo betra við þegar sami fjármálaráðherra lýsti því yfir að hann vildi nú einkavæða Landsvirkjun. Það er ekki annað en einkavæðing sem er lagt til þótt það sé kallað eitthvað annað. Og heilbrigðisráðherra vill einkavæða og selja til að geta byggt nýjan Landspítala. En það var náttúrulega bæði búið að selja og einkavæða bankana og Símann til þess að byggja spítala. Nú á að gera það aftur. Er það fleira sem á að gera aftur? Nýtt hrun? Er verið að leggja í það púkk aftur?

En þá spyr ég samt enn á ný einsog sá fávísi kall sem ég er: Hvað með svigrúmið? 800 milljarða króna svigrúmið? Horfum jafnvel bara á þessa 240-300 milljarða sem átti nú ekki að vera óhægt um vik að sækja til hrægamma okkar, og jafnvel þótt við tökum frá 80 milljarðana sem fara í leiðréttinguna. Þá eru enn eftir 160-220 milljarðar.

Hvað eru það miklir peningar? Einir 3-4 spítalar?

Afhverju þarf þá að selja Landsvirkjun til að byggja spítala?