Ritstjórn 31/03/2014

Mjög fáir eiga rétt á fullri millifærslu. Ráðherra ekki með dæmin á hreinu

Mjög fáir eiga rétt á fullri millifærslu til skuldalækkunar samkvæmt tillögum ríkisstjórnarinnar. Þetta kom fram í máli forsætisráðherra á Stöð 2 í kvöld.Sigmundur Davíð

Sigmundur Davíð Gunnlaugsson sat fyrir svörum í þættinum Stóru málin, þar sem Lóa Pind Aldísardóttir spurði hann út í millifærslutillögur ríkisstjórnarinnar.

Lóa Pind bar saman nokkrar glærur annars vegar frá kynningu í Hörpu í lok nóvember og hins vegar frá kynningu forsætis- og fjármalaráðherra í Iðnó í síðustu viku. Þeim bar ekki saman um tiltekin dæmi og virtust hafa breyst frá fyrri kynningu til þeirrar seinni.

Aðspurður um þessi dæmi af glærunum, sem þeir Bjarni Benediktsson kynntu, kvaðst Sigmundur Davíð ekki kunna nákvæm skil á þeim og hóf svör sín iðulega með orðum á borð við „Ef ég ætti að giska“ og „Ef ég ætti að geta mér til…“

Í lok þáttarins vék Lóa Pind að skerðingarliðum tillagnanna og nefndi til sögunnar sérstakar vaxtabætur, sem síðasta ríkisstjórn jók til mikilla muna, en þær koma til skerðingar millifærslunnar nú líkt og flestar aðrar aðgerðir fyrri ríkisstjórnar.

Hún spurði – í ljósi umfangs sérstöku vaxtabótanna – hvort ekki væri ólíklegt að nokkur ætti rétt á fullri millifærslu eins og ríkisstjórnin hefði kynnt hana.

Forsætisráðherra tók undir að sérstöku vaxtabæturnar hefðu verið víðtækar, en vildi þó ekki meina að þær hefðu mikil áhrif að þessu leyti. Hann viðurkenndi þó að „fáar fjölskyldur“ myndu fá fulla millifærslu, en það væri vegna þess að svo fáir skulduðu svo mikið.

Athygli vakti að forsætisráðherra talaði ítrekað um „fyrri og seinni hluta“ aðgerðanna, þ.e. annars vegar millifærsluna úr ríkissjóði og hins vegar heimild fólks til að nýta séreignasparnað til að lækka skuldir sínar.

Flokkun : Efst á baugi
0,882