Margsaga

 

Tveir æðstu „herforingjar“ landsins, forstjóri vopnaðrar landhelgisgæslu og ríkislögreglustjóri, yfirmaður vopnaðrar sérsveitar lögreglunnar eru ósannindamenn svo ekki sé sterkar að orði kveðið. Hvort ástæðan er yfirlæti eða vanþekking skiptir engu máli því söm er gjörðin.

 

 

Frá öðrum þeirra eða báðum barst það út að norsku byssurnar sem þeir sníktu af Norðmönnum hafi verið gjöf. Fjöldi vopnanna var á reiki. Stuttu síðar sagði forstjóri Gæslunnar að það hefði verið gerður samningur. Hann væri bundin Nató-leynd. Sólarhring síðar birti hann samninginn án samráðs við Nató. En hann rauf ekki leyndina því að þetta var ekki Nató-samningur, heldur aðeins kaupsamningur á milli Norðmanna og Íslendinga og undirritaður af birgðaverði Gæslunnar. Og óyfirlesinn, nema forstjóri gæslunnar skrökvi enn, því reikningur verður sendur „í lok árs 2014 og aftur í lok árs 2015, samkvæmt … áður gerðum gagnkvæmum samningum,“ segir sérstakur ráðgjafi norska varnarmálaráðherrans eftir fréttum Stöðvar 2 þann 05.11.2014  og Vísis.is sama dag.

Skreytni þeirra vopnabræðra hefur gengið svo fram af fólki að meira að segja yfirmanni þeirra, ráðherranum (Sigmundi Davíð eða Hönnu Birnu nema þau séu það bæði) sem kallar þó ekki allt ömmu sína í þeim efnum er nóg boðið því að hann hefur (eða þau) beðið Norðmenn um að segja ekki meira um málið, sé eftirfarandi partur úr frétt áðurnefndra miðla réttur: „Að beiðni íslenskra stjórnvalda mun norska varnarmálaráðuneytið á þessu stigi máls ekki greina nánar frá flutningi annarra vopna til Íslands,“ segir Birgitte Frisch sérstakur ráðgjafi varnarmálaráðherra Noregs.

… ekki greina nánar frá flutningi annarra vopna til Íslands …

Mögnuð setning. Hlaðin.

Af framansögðu er fyllilega réttmætt að spyrja hvort það sé ekkert í ráðningasamningum æðstu embættismanna um að þeim beri að segja satt í vinnunni og um vinnuna til þess að halda vinnunni?