Sparkhéðinn 23/06/2014

Magnús Geir: Kauptu Gumma Ben.

Það er bara eitt að gera í ruglinu með lýsingarnar á leikjum á HM. Opna félagaskiptaglugga.Gummi og Maggi

Í honum kaupir RÚV Gumma Ben., konung lýsinga á Stöð 2. Upp í kaupverðið er settur sá eini nothæfi á RÚV, Einar Örn Jónsson. Samt þarf líklega að borga töluvert á milli.

Þeir vita hvað þeir eru að gera. Góðir lýsendur eiga að bæta við leikinn. Þeir eru ekki ráðnir til að segja fólki það sem það sér. Það sér það sem það sér.

Með alvörulýsendum losna áhorfendur við truflandi ruglandi einsog Höddi stræker bauð uppá í leik Portúgals og Bandaríkjanna:

„Gaman að sjá hvernig leikmaðurinn beitti líkamanum.“ Rétt hjá Hödda. Fótboltamenn beita líkamanum almennt alltof lítið. Þyrftu að gera meira af því.

„Gamla, góða línubjörgunin,“ kom líka uppúr honum í sama leik. Þessi frasi er stolinn úr auglýsingu: „Glæný línubjörgun, glæný línubjörgun. Depla, Kolaportinu.“

Tips til Hödda og hinna: Að vera fyndinn, eða bara pínkusmá skemmtilegur, felst í því að fá áhorfendur til að brosa með sér. Ekki hlæja að sér.

Taktu nú upp tékkheftið, Magnús Geir, og borgaðu Stöð 2 slummu fyrir Gumma Ben. Bara í hálfan mánuð. Það bjargar restinni af HM.

Settu samt skilyrði í samninginn: Gummi má ekki jórtra margtuggna frasann: „Hann náði ekki að halda honum niðri.“

Það eru börn að horfa.

Flokkun : Pistlar
0,922