Leiðtogar ljóss og myrkurs: „Komið ekki til mín, þér sem erfiðið og þunga eruð hlaðnir.“

Því sem okkur er heilagt er vissulega ógnað. En það eru ekki hryðjuverkamenn sem eru að drepa það. Leiðtogar myrkurs og dauða eru unnvörpum að láta okkur gera það sjálf.

Svo segir séra Davíð Þór Jónsson í grein í Herðubreið, sem er samstofna við prédikun sem hann flutti við jólanáttsöng í Eskifjarðarkirkju á aðfangadagskvöld og í guðsþjónustu í Þingmúlakirkju á jóladag. Séra Davíð segir ennfremur og vísar í nýja og nýliðna tíð:

„Upphafið var tiltölulega sakleysislegt. Fyrst  var varað við fólki af ákveðnum uppruna og samneyti við það af því að þetta fólk blandaðist ekki öðrum og hélt fast í siði sína og venjur. Þá komu samsæriskenningarnar, fólk af þessum uppruna var allt þátttakendur í svívirðilegri ráðagerð um að knésetja hina göfugu menningu Vesturlanda. Síðan var farið að sniðganga verslanir og fyrirtæki í eigu þessa fólks, bænahúsum þess var lokað og bygging þeirra  bönnuð. Látið var óátalið að fólk neitaði að leigja því íbúðarhúsnæði vegna trúar þess og uppruna. Gott en grunnhyggið fólk hafði einfaldlega verið gert logandi hrætt við þennan hóp samborgara sinna. […]

Hljómar þetta kunnuglega? Hafið þið rekist á eitthvað í líkingu við þetta í fjölmiðlum á árinu sem senn er liðið?“

Hann segir ennfremur:

„Mesta ógnin við öryggi Evrópu nú um stundir er lýðskrum, þjóðremba og skeytingarleysi almennra borgara. Sagan kennir okkur að slíku fylgir mun víðtækari tortíming og dauði en misstórum og miseinangruðum hópum vopnaðra brjálæðinga.“

Séra Davíð bætir við:

„Leiðtogar myrkurs og dauða taka hvern þann málstað sem þeir telja líklegastan til að afla sér fylgis án nokkurs tillits til afleiðinganna fyrir samfélagið, jafnvel án nokkurs tillits til borðleggjandi staðreynda, í þeim tilgangi að halda sinni háu stöðu í samfélaginu.“

Grein – prédikun – séra Davíðs í heild má lesa hér.