Hrægammsraunir

Kæra Eva!

Mig vantar góð ráð. Við fjölskyldan erum orðin hrægammar.  Sigmundur ætlar að láta 70 þúsund fjölskyldur fá 250 þúsund krónur á ári upp í vondu lánin sín og við fjölskyldan og aðrar 125 þúsund fjölskyldur eigum nú að borga það.

Við sem höfum lifað af að Bæjarins bestu hækkuðu úr 3 krónum (1953) í 38 þúsund krónur (380×100) lifum þetta af,  en hann sagðist ætlaði að láta hrægamma borga þetta. Ég hélt að hann væri að tala um einhverja vonda útlendinga, en datt ekki í hug að hann ætti við okkur fjölskylduna. Þetta eru  altént 1500 pulsur.  Hvað á ég að gera? Bara borga?

Bjarni ætlar ekki að taka neina peninga af okkur foreldrunum. Bara börnunum okkar, eða barnabörnunum. Við opnum bráðum reikning í Íslandsbanka og skírum hann SÉRSPARNAÐ, söfnum í hann 500 þúsund á ári sem dragast svo frá höfuðstól húsnæðislánsins. Tær snilld.

Af þessari upphæð þarf ég aldrei að greiða skatt, hvorki nú eða síðar. Ég græði sem sé 250 þúsund krónur eða 650 pulsur á þessu árlega. Bjarna vantar þessa peninga svo mikið í kassann að ég má ekki gera þetta nema í þrjú ár.

Ég mun auðvitað ekki eiga fyrir eins mörgum pulsum þegar ég fer að taka lífeyri og það mun vanta margar skattkrónur í ríkiskassann.  Það þýðir að barnabörnin mín greiða hærri skatta í framtíðinni þegar í ljós kemur að þessa peninga vantar í kassann hjá Bjarna. Finnst þér að ég ætti að skrifa honum
eða segja bara eins og Danir „Den tid den sorg“.

Fyrsta heimsmetið hans Sigmundar var kynnt í Hörpunni, næsta heimsmetið á annarri hæð í Iðnó. Hvar finnst þér ætti að kynna þriðja heimsmetið um afnám verðtryggingar og fjórða heimsmetið um lyklafrumvarpið. Ertu með hugmyndir? Er Simmasjoppa til ennþá?