Ritstjórn 13/09/2014

Hið ömurlega andlausa þjark. Það er munur á Samfylkingu og Bjartri framtíð

Árni Páll og GuðmundurÞað er raunverulegur munur á Samfylkingunni og Bjartri framtíð. Þetta er niðurstaða Karls Th. Birgissonar ritstjóra Herðubreiðar í nýjasta pistli hans.

Kveikjan er umræður á alþingi á föstudag þegar Sigmundur Davíð Gunnlaugsson forsætisráðherra neitaði að svara öðrum spurningum um fjárlagafrumvarpið en þeim sem lutu að dómsmálum.

„Það varð tilefni dapurlega kunnuglegra þrasumræðna um hvort ráðherrann ætlaði virkilega ekki að svara því sem hann var spurður um – hvurslags dónaskapur það væri nú eiginlega. Jafnvel þótt það væri ekki á dagskrá og jafnvel þótt þingforsetinn, sjálfur Kristján Möller, úrskurðaði að málefni forsætisráðuneytisins væru ekki til umræðu,“ segir Karl í pistli sínum.

Hann vekur athygli á því að þingmenn Bjartrar framtíðar og Pírata tóku ekki þátt í þessum umræðum, og víkur einnig orðum að forystumönnum flokkanna sem mynduðu síðustu ríkisstjórn:

„Hverjir stóðu í þessu þrasi? Þingmenn Samfylkingarinnar og Vinstri grænna. Og það voru engir tindátar, heldur formenn og þingflokksformenn þessara flokka. Ekki er nokkur leið að skilja hvað þau héldu að þau fengju út úr þessu andlausa þjarki. Annað en að komast í kvöldfréttirnar sem fulltrúar þess sem fólki finnst ömurlegast við hin gömlu stjórnmál. Það var samt áreiðanlega ekki ætlunin.“

Pistlar Karls eru nú bundnir áskrift sem kostar aðeins 290 krónur á mánuði. Sjá nánar hér.

Flokkun : Efst á baugi
0,931