Ritstjórn 16/01/2015

Herðubreið fagnar öflugum liðsstyrk: Björgvin G. Sigurðsson ráðinn annar ritstjóri

Björgvin G. SigurðssonBjörgvin G. Sigurðsson hefur verið ráðinn annar ritstjóri Herðubreiðar og mun sinna því ásamt Karli Th. Birgissyni sem verið hefur ritstjóri frá upphafi. Karl segir þetta í samræmi við áform um vöxt og eflingu útgáfunnar.

„Við fögnum komu Björgvins mjög enda hefur hann víðtæka þekkingu og reynslu af þjóðfélaginu og samfélagsmálum. Auk þess býr hann yfir margvíslegri reynslu af útgáfu og blaðamennsku,“ segir Karl.

„Herðubreið hefur fengið ævintýralega góðar viðtökur og höfum lengi haft hug á að efla hana enn frekar. Ráðning Björgvins er lykilskref í því enda er hann uppfullur af orku og hugmyndum. Ég hlakka mikið til.“

Er ekki kominn óþarflega mikill Samfylkingarþefur af Herðubreið með ykkur tvo þarna innan borðs?

„Við Björgvin erum að vísu báðir í Samfylkingunni, en ég hef aldrei nennt að hugsa í slíkum boxum. Lífið er of skemmtilegt og margbreytilegt til þess. Við erum fyrst og fremst frjálslyndir og alþjóðlega sinnaðir jafnaðarmenn. Það sem við gerum og skrifum mótast af því, en ekki meintum hagsmunum einhverra flokka. Herðubreið er þjóðarfjall, ekki flokksfjall.“

Flokkun : Efst á baugi
1,658