Halla lendir í Tepokahreyfingunni: Koch-bræður reyna að stöðva almenningssamgöngur

Halla Gunnarsdóttir heldur áfram í Herðubreið að senda íslensku þjóðinni bréf frá Nashville, þar sem ýmislegt drífur á daga hennar.

Nú síðast hefur hún kynnst á eigin skinni vinnubrögðum Tepokahreyfingarinnar – eða öllu heldur helstu fjárhagslegu bakhjörlum hennar – sem berjast gegn bættum almenningssamgöngum í Nashville:

„Nú hefur hinni rökföstu stopp-hreyfingu borist öflugur liðsauki, nánar tiltekið frá bræðrunum David og Charles Koch. Þeir hafa farið víða með fjármagn sitt og áhrif síðustu ár og eru einn helsti drifkrafturinn að baki teboðs-hreyfingunni. Í gegnum lobbýistasamtökin Americans for Prosperity vinna Koch-bræður hugðarefnum sínum brautargengi, en þau eru einkum að koma í veg fyrir skattheimtu og takmarka umsvif hins opinbera. […]

Koch-bræður eru því mættir til Tennessee, að sjálfsögðu ekki í eigin persónu, þeir búa í Kansas og New York. En peningarnir þeirra og hugmyndafræði eru komin á staðinn til að brjóta á bak aftur tilraunir Nashville-borgar til að færast aðeins nær því að vera borg, en ekki bara tilviljanakennt samansafn af húsum og kjörnum sem eru lauslega tengd saman með einkabílum.“

Nýjasta bréf Höllu til Íslands má lesa hér.