Fjármálaráðherra veit ekki í hvað stóra millifærslan fer. Getur ekki svarað þingmönnum

Bjarni Benediktsson fjármálaráðherra getur ekki svarað því, hvernig 80 milljarða útgjöldum úr ríkissjóði er ráðstafað. Hann boðar að það verði upplýst síðar.

Þetta kemur fram í grein sem Björn Valur Gíslason varaþingmaður skrifar í dag.

Hann bað fjármálaráðherra um upplýsingar um hvernig 80 milljarða millifærslunni yrði ráðstafað og spurði þessara spurninga:

1. Hversu hárri upphæð af þeim 80 milljörðum kr. sem greiða á úr ríkissjóði vegna lækkunar íbúðalána verður ráðstafað til að greiða:

a) fasteignaveðkröfur sem glatað hafa veðtryggingu sinni í kjölfar nauðungarsölu eða annarrar ráðstöfunar eignar eftir 1. janúar 2008 og ekki hafa verið felldar endanlega niður gagnvart umsækjanda

b) greiðslujöfnunarreikning skuldara hjá fjármálastofnunum,

c) vanskil skuldara við fjármálastofnanir (sundurliðað eftir fjármálastofnunum),

d) dráttarvexti skuldara vegna vanskila á greiðslum (sundurliðað eftir lánastofnunum),

e) skuldir af öðrum ástæðum?

2. Er ríkisábyrgð á greiðslujöfnunarreikningum skuldara hjá fjármálastofnunum?

Í svari sínu sagðist fjármálaráðherra ekki geta svarað fyrri töluliðnum, en kvaðst myndu skila skýrslu þegar upplýsingarnar lægju fyrir. Seinni töluliðnum svaraði ráðherra neitandi.

Katrín Jakobsdóttir spurði ráðherra einnig út ýmis atriði í millifærslunni og fékk svar sama eðlis.