Ritstjórn 03/06/2015

Eru viðskipti við MP banka kjarni tilrauna til að kúga fé út úr forsætisráðherra?

Svo virðist sem viðskipti við MP banka séu kjarninn í þeim upplýsingum sem Hlín Einarsdóttir notaði til að reyna að kúga fé út úr Sigmundi Davíð Gunnlaugssyni.Sigmundur Davíð

Þetta má lesa úr pistli Karls Th. Birgissonar, ritstjóra Herðubreiðar, sem birtist í gærkvöldi.

Karl segir yfirlýsingar Sigmundar Davíðs og Björns Inga Hrafnssonar um samskipti þeirra vegna kaupa þess síðarnefnda á DV ófullnægjandi og ekki svara mikilvægum spurningum:

„Átti ráðherrann einhvern hlut að máli í þessum viðskiptum eða aðdraganda þeirra? Var hann með í ráðum með einhverjum hætti? Liðkaði hann fyrir þeim á einhverju stigi? Var Björn Ingi í sambandi við hann á meðan á viðskiptunum stóð? Var ráðherrann í sambandi við aðra um þau mál?

Og er rétt, sem ég hef bjargtraustar heimildir fyrir, að MP banki komi við sögu í bréfinu og að viðskipti tengd honum séu jafnvel kjarninn í hótunum bréfritara?“

MP banki hefur komið með ýmsum hætti við sögu í störfum ríkisstjórnarinnar. Einn framkvæmdastjóra bankans er Sigurður Hannesson. Hann er vinur forsætisráðherra, hélt utan um útreikninga og útfærslu á niðurgreiðslu verðtryggðra húsnæðislána og var i upphafi árs ráðinn til ráðgjafar um afnám gjaldeyrishafta, svo tvennt sé nefnt.

Tengsl forsætisráðherrans og MP banka komu einnig til tals þegar bankaskattur var lagður á með þeim hætti, eftir breytingartillögu, að MP banki slapp að mestu leyti við greiðslu skattsins.

Þess er rétt að geta að þingmenn Framsóknarflokksins, svo sem Vigdís Hauksdóttir og Elsa Lára Arnardóttir, hafa kallað umræður um innihald hótunarbréfsins dylgjur og spuna.

Í lok pistils síns rifjar ritstjóri Herðubreiðar upp annað lögreglumál tengt ráðherra í ríkisstjórninni:

„Í lekamálinu var það ekki lekinn sjálfur sem varð Hönnu Birnu að falli. Hann varð að lögreglumáli og það hafði sinn gang.

Mistök Hönnu Birnu fólust í viðbrögðunum, undanfærslum og ósannindum. Þetta gæti verið rétti tímapunkturinn fyrir forsætisráðherra að rifja upp lærdóminn af því.“

Sjá pistil Karls hér.

 

 

Flokkun : Efst á baugi
1,750