Ritstjórn 28/03/2014

Eru stjórnarflokkarnir að kaupa kosningar og völd fyrir skattfé – aftur?

Bjarni Benediktsson ætti kannski að hlusta minna á Framsóknarflokkinn og meira á sjálfan sig, segir Þórður Snær Júlíusson ritstjóri Kjarnans í grein í vefritinu í dag.Þórður Snær

Hann fjallar þar um skuldamál ríkisstjórnarinnar og minnir á, að í frumvarpi um þau sé ekki gert ráð fyrir neinu verðbólguviðmiði í útreikningum, heldur skuli fjármálaráðherra ákvarða það með reglugerð. Þórður skrifar:

„Þrátt fyrir að ekki sé miðað við neitt verðbólguviðmið er samt sem áður fullyrt að „leiðréttingin“ muni kosta 80 milljarða króna. Nú snýst þetta semsagt ekki um að „leiðrétta forsendubrest vegna verðbólguþróunar“ heldur að koma allt að 80 milljörðum króna úr ríkissjóði til hluta þjóðarinnar vegna þess að Framsóknarflokkurinn var búinn að lofa henni peningum! Og Sjálfstæðisflokkurinn samþykkti að láta ríkissjóð borga til að komast til valda! Þetta heitir á mannamáli að kaupa kosningar.“

Þórður telur tímasetningu framkvæmdarinnar ekki tilviljun:

„Tímasetning upphafs peningagjafanna, tveimur vikum fyrir næstu sveitastjórnarkosningar,  hefur ugglaust allt með það að gera að Framsóknarflokkurinn mælist með tveggja prósenta fylgi í höfuðborginni, þar sem þorri skuldaniðurfellingaregnsins lendir, og að Sjálfstæðisflokkurinn er pikkfastur í minnsta hlutfallslega fylgi þar sem hann hefur nokkru sinni mælst með.“

Þórður Snær minnir ennfremur á, að lífeyriskerfið standi ekki undir framtíðarskuldbindingum – til þess vanti eina 900 milljarða króna:

„Ríkið, sem er nú upptekið við að gefa peninga til einhverra og hækka ekki laun kennara, skuldar kerfinu um helming þeirrar upphæðar. […] En þetta skiptir engu máli í dag. Ríkisstjórnin lifir í núinu. Og núið snýst um að gefa tugmilljarða króna skattfé til fólks sem þarf ekki á því að halda með snilldarlegri tæknilegri útfærslu sem kostar 300 milljónir króna og gerir úttektina auðveldari en að panta pizzu. Það er endurgreiðslan fyrir völdin sem síðustu kosningar færðu henni. Hitt reddast.“

Þórður bætir við: „Bjarni Benediktsson fjármálaráðherra sagði á aðalfundi Seðlabankans í gær að við ættum „að temja okkur að búa í haginn fyrir framtíðina, í stórum sem smáum atriðum“. Hann ætti kannski að hlusta minna á Framsókn og meira á sjálfan sig.“

Greinin í heild er hér.

Flokkun : Efst á baugi
1,313