Ritstjórn 28/03/2014

Enn fjölgar gjaldmiðlum: Isracoin kemur í næstu viku

Í næstu viku verður „gefinn út“ ísraelski rafgjaldmiðilinn isracoin. Hann er byggður á svipuðum grunni og bitcoin og hinn íslenski auroracoin, sem Íslendingum bauðst að sækja rafrænt í vikunni.Rafgjaldmiðlar

Frá þessu er greint í ísraelska blaðinu Ha´aretz í dag.

Ísraelsku „höfundarnir“ fara þó nýja leið í útgáfunni: Í fyrri hluta hennar – á miðvikudag – verður fyrirtækjum, sem samþykkja að taka gjaldmiðilinn upp í viðskiptum, úthlutað 500 einingum, en ekki fleiri en 50 þúsund fyrirtækjum.

Þessu er ætlað að undirbúa næsta stig, þegar allt að 2,8 milljónir ísraelskra ríkisborgara fá aðgang að myntinni, mánuði síðar.

Röksemdafærsla aðstandenda isracoin er athyglisverð. Þau segja fjármagn og eignir í landinu í höndum fárra banka, sem iðki fákeppni og ofurgjaldtöku, og hafi í gegnum þessar eignir óeðlileg áhrif á stjórnmálalíf í landinu.

Með útgáfu isracoin vilji þau dreifa völdum í samfélaginu.

Greint var frá því í gær (meðal annars á Eyjunni), að markaður hefði myndast með auroracoin á Íslandi og margvíslegir nytjahlutir, jafnvel notaðir bílar, væru nú til sölu gegn framreiðslu slíks fjár.

Einnig hefði myndast „gjaldeyrismarkaður“, en gengi auroracoin alls staðar væri mjög óstöðugt enn sem komið er. Eiginlega ævintýralega óstöðugt.

 

Flokkun : Efst á baugi
1,406