Ekkert

 

Þau undur hafa gerst að forseti Íslands hefur þagað lengi. Eiginlega alveg síðan hann varði Pútín á fundi Norðurslóðaríkjanna fyrir mörgum mánuðum. Um svipað leyti lét hann gefa út þá yfirlýsingu að hann væri ekki til viðtals um það sem hann hefði sagt í síðustu kosningabaráttu; orð og ummæli sögð þá væru ekki í gildi nú.

Þessa vegna ríkti nokkur eftirvænting við setningu Alþingis. Fjöldinn bjóst við því að hann léti menn heyra´ða, þá sem eru að méla máttarstólpa samfélagsins og leggja það undir sig með hótunum.

Og svo tók hann til máls og talaði um: Dýrðarljóma fortíðar. Einstæð afrek Íslendinga í veraldarsögunni. Fyrsta þjóðkjörna forseta heimsins. Samstöðu og einhug þings og þjóðar að fornu og nýju. Íslendinga í fremstu röð. Einstæðan árangur á Evrópuvísu. Fjöregg lýðveldisins, sóma og sjálfsvirðingu íslensku þjóðarinnar.

Það þarf ekki að slá upp í bókum til þess að komast að því hvaða orð eru höfð um málflutning af þessu tagi. Því til viðbótar er það um hann að segja að ræðan var full af rangfærslum. Að því slepptu var hún um ekki neitt. Samandregin umsögn um málflutning þjóðhöfðingjans er því þessi:

Eftir margra mánaða þögn talaði hann í tíu mínútur og sagði ekkert.