Nýstárleg neytendavernd: Bókin fæst endurgreidd ef hún er leiðinleg – Ólafur Ragnar er ekki nógu sexí

Útgefandi bókar Karls Th. Birgissonar um forsetakjörið 2012 býðst til að endurgreiða kaupverðið ef bókin reynist vera leiðinleg. Herðubreið er ekki kunnugt um að útgefendur hafi boðið álíka neytendavernd áður.

„Ástæður þessa eru tvær,“ segir Karl í samtali við Herðubreið. „Í fyrsta lagi erum við handviss um að bókin er þrælskemmtileg. Ekki þarf að hafa mín orð fyrir því. Guðni Th. Jóhannesson segir að hún sé skyldulesning, bæði fróðleg og skemmtileg. Svanhildur Hólm Valsdóttir segir að hún sé listilega vel skrifuð. Margrét Tryggvadóttir kallar hana bráðfyndna. Davíð Þór Jónsson lýsir henni sem spennusögu.

Ég roðnaði þegar ég las þessi komment.

Í annan stað höfum við orðið þess áþreifanlega vör, að andlit Ólafs Ragnars Grímssonar á kápunni er ekki mjög sexí söluvara um þessar mundir. Bókin er þó alls ekki um hann, heldur ekki síður framboð Þóru Arnórsdóttur og alla dýnamíkina í þessum sögulegu kosningum. Það var hins vegar of seint að breyta kápunni eftir að forsetinn tilkynnti í allra síðasta skiptið að hann ætlaði ekki að bjóða sig fram aftur.

Meginskilaboðin eru líklega þessi: Bókin er sumarlesning ársins þrátt fyrir Ólaf Ragnar á kápunni. Mér þykir sárt að segja þetta, því að Ólafur getur verið skemmtilegri en margur heldur. Hann kýs bara að fara vel með það.“

Bók Karls er gefin út í samvinnu við Karolina Fund og hann segir ekki sjálfgefið að hún komi út: „Til þess þurfa þó ekki nema 150-200 manns að tryggja sér eintak í síðasta lagi á sunnudagskvöld. Textinn bíður eftir lesendum sínum.“

Hægt er að taka þátt í útgáfu bókarinnar hér.