Atlaga
Sérstakur saksóknari er við það að fara að flytja fyrir rétti stærsta málið varðandi ætlað svindl bankamanna á dögunum fyrir Hrun. Marg-miljarðamál.
Hinir stefndu í málinu hafa þegar hafið atlögu að saksóknaranum undir stjórn lögmanna sinna sem væntanlega fá launin sín greidd út af Tortúla-reikningum skúrkanna. Ætla má að þau nemi mörgum tugum miljóna.
Fyrsta árásin í þessari lotu var gerð innan úr borgardómi. Atvinnudómarinn kvaddi sem meðdómara prófessor í lögum frá Háskólanum í Reykjavík. Hann er bróðir eins af þeim sem næstur verður leiddur fyrir dómara. Prófessorinn stóð að sýknudómi í því máli sem hann var kvaddur til. Þó að það hefi ekki verið sagt opinberlega er ljóst að sá dómur átti að veikja embætti saksóknara og auka líkur á sýknu í stóra málinu sem næst verður flutt.
Í framhaldinu komu aðrir fram. Atlaga þeirra gegn saksóknara snýst um að gera störf hans tortryggileg. Sakborningarnir og kippa af lögmönnum skrifa greinar og fá tekin við sig viðtöl í blöðum og sjónvarpi um að saksóknari stundi óheiðarleg vinnubrögð. Og ólögleg. Málflutninginn má skilja svo að hann sé svindlari, lygari og falsari. Það er ömurlegt að horfa upp á „virta“ lögmenn haga sér svona.
Hvað sem menn vilja segja um réttarfarið í landinu höfum við ekki betri leið til þess að leiða fram rétt og rangt – miðað við gildandi lög, vond eða góð – en þá að ræða um atferli ætlaðra brotamanna í réttarsal.
Það er vonandi að landsmenn láti ekki blindast af „stjörnunum“.