Alvörumálin í komandi kosningum í Reykjavík: Gjaldfrjáls leikskóli, húsnæði og óspilltir stjórnmálamenn

„Kannanir sýna að fjárfesting í góðum leikskóla, fyrsta skrefinu á menntabrautinni, borgar sig hratt aftur. Aðstöðumunur stétta minnkar, jaðarhópar eins og nýbúar komast á jafnréttisgrundvelli til móts við félaga sína – hér byrjum við að brúa menningargjár.“

Þetta kallar Stefán Jón Hafstein fyrrverandi borgarfulltrúi annað tveggja höfuðmála borgarstjórnarkosninga í grein í Herðubreið og hrósar Vinstri grænum fyrir frumkvæði í þessum efnum.

Hann nefnir einnig til sögunnar húsnæðismál:

„Samfylkingin hefur hins vegar, réttilega, sett húsnæðismálin í brennidepil. Við búum við óþolandi markaðsbrest og félagsleg úrræði eru nauðsyn. Það verður ekki auðvelt að fjármagna og reka 2500-3000 leiguíbúðir. Hér eru svo mörg víti að varast að ekki er hægt að telja upp, en nauðsyn er brýn.

Manni sýnist óhjákvæmilegt að byggingarkostnaður verði meiri en leigutekjur standi undir. Það er vandinn í hnotskurn. Einhver borgar það bil en það frumkvæði og áræði sem Samfylkingin sýnir er lofsvert.“

Önnur framboð fá síðri dóma, en Stefán Jón segir engar hugmyndir góðar nema að baki þeim sé fólk sem getur hrint þeim í framkvæmd – óspilltir stjórnmálamenn:

„Því miður er það fyrsta spurningin sem maður spyr í dag.“

Grein Stefáns Jóns í heild er hér.