Aftur á hælið með hann

Þessi eini sem heldur því fram að David Moyes hafi flóavit á fótbolta ætti að tékka sig aftur inn á hælið þaðan sem hann er nýsloppinn.

Nema sá hinn sami eigi við þessi víðkunnu sannindi: „Moyes reyndi árum saman að koma Everton upp fyrir Manchester United á stigatöflunni. Nú hefur honum loksins tekist það.“

Sá sem stillir aldrei upp sigurliði tvisvar í röð veit ekkert hvað hann er að gera. Hann er að fara á taugum.

Sá sem stillir upp Fellaini og Cleverly á miðjunni gegn Manchester City veit ekkert um fótbolta. Hann er að staupa sig á daginn.

Sá sem kaupir Fellaini fyrir morð fjár á í einhverju sambandi við það belgíska tökubarn sem sómakært fjölskyldufólk vill ekki vita um.

Sá sem notar ekki Januzaj — mesta efnið í deildinni — í leik eftir leik eftir leik, hann er með lepp fyrir báðum skosku viskíaugunum.

Sá sem leggur upp með fyrirgjafir af kantinum, hættir ekki eftir fimmtíu þegar engin virkar, heldur frekar áfram upp í 84 án þess að nein þeirra skili árangri — hann gengur ekki á öllum ventlum.

Ó, auðvitað. Fyrirgefiði. Þetta segir sig sjálft:

Þessi eini sem heldur að David Moyes viti eitthvað um fótbolta er hann sjálfur.

Aftur á hælið með hann.