Ritstjórn 02/04/2014

„Aðgöngumiðar fjúka um alla hveri.“ Landeigendur biðja líka um „frjáls framlög“

„Ég greiddi 2.400 kr. í dag fyrir 4 inn á Geysissvæðið. Þetta fór allt friðsamlega fram enda voru fleiri starfsmenn að taka gjald en ferðamenn að skoða svæðið þegar okkur bar að garði.“Strokkur

Þannig lýsir Stefán Karl Stefánsson leikari upplifun sinni af heimsókn á Geysissvæðið í gær. Þar er nú aftur krafist gjalds fyrir aðgang.

Stefán Karl heldur áfram:

„Mér var réttur bæklingur á ensku um svæðið og glansandi aðgöngumiði. Svo gekk ég fjögur skref og þar var indæl kona sem skannaði miðana og tryggði að við værum búin að borga. Á meðan voru fjórir aðrir starfsmenn sem horfðu á til öryggis.

Ég gat svo ekki annað en hlegið að það fyrsta sem við mér blasti var stór stáltankur sem á stóð: „Donate here“ og var þá verið að óska eftir frjálsum framlögum líka. Samkv. starfsmanni er áætlað að um 900.000 manns heimsæki Geysi í ár sem þýðir hátt í 600 milljónir + það sem safnast í stáltankinn. Ég býst þá við að það verði byggð glerkúla yfir svæðið því hvað ætla þeir eiginlega að vernda svæðið mikið ef ég má spyrja? Það eru ekki einu sinni ruslatunnur á svæðinu heldur fjúka aðgöngumiðar þarna um alla hveri.

Þetta er allt heldur óheppilegt og eiginlega bara svolítið kjánalegt. En ég sé svosem ekkert eftir peningnum en hlakka til að sjá þá svakalegu náttúrulegu uppbyggingu á svæðinu sem fæst fyrir þá milljarða sem safnast á næstu árum, því ekki myndi þessu heiðarlega fólki detta það í hug að nota þessa peninga til eigin nota t.d. byggingu hótels og svona vitleysu.

Það dettur ekki heiðarlegum ferðaþjónustufrömuðum í hug að gera enda væri slíkt brot á hegningarlögum og myndi flokkast undir þjófnað.“

Flokkun : Efst á baugi
0,764