Ritstjórn 28/03/2015

Að liðnu ári: Lesendur vilja eiga sína Herðubreið. Þakk fyrir viðtökurnar

HerðubreiðTímaritið Herðubreið fagnar nú ársafmæli sínu í gerbreyttri mynd á vefnum. Á þeim tíma hafa birst á síðum hennar um 700 pistlar, 170 ljóð, þar af ótalmörg frumbirt hér, og 150 orðskýringar.

Þetta er auk lengri greina, frétta og fréttaskýringa, palladóma og eftirmæla, ritdóma og sögulegs fróðleiks, og alls hins sem á erindi í tímarit eins og Herðubreið.

Herðubreið vill bjóða upp á öðruvísi efni en aðrir; það eltir ekki hinn daglega fréttahasar, hneyskli eða hneykslun dagsins, og alla smástormana sem okkur tekst að búa til í svo litlu samfélagi.

Reynslan sýnir að fólk kann vel að meta slíkt efni. Tugir þúsunda lesa Herðubreið í hverri viku og Google fullyrðir að það sé undantekningalítið fullorðið fólk, ekki börn og unglingar. Ekki lýgur Google. Fyrir þessar viðtökur og stuðning er ritnefnd Herðubreiðar ákaflega þakklát.

(Og þakk líka, þú dyggi lesandi í Laos.)

Herðubreið fer heldur ekki í grafgötur með að hún er málgagn jafnaðarstefnu. Það þýðir ekki að hún sé flokksmálgagn – fjarri því. Þvert á móti nálgast hún menn og málefni óháð flokkum, en eftir leiðarhnoðum jafnaðarstefnunnar, sem eru frelsi einstaklingsins, réttlæti og jöfnuður í víðtækum skilningi.

Við fjármögnun hefur Herðubreið líka farið ótroðnar slóðir. Allt efni hennar er „ókeypis“ fyrir lesendur, nema greinar ritstjórans í sérstökum dálki, Óumbeðnar athugasemdir. Fyrir þann texta greiða áskrifendur 1,8 evrur (um 290 krónur) á mánuði, en greiða með því um leið fyrir áframhaldandi tilvist Herðubreiðar. Þessari nýjung hefur líka verið tekið framar vonum og sýnir enn frekar að lesendur vilja eiga sína Herðubreið.

Myndin hér að ofan er hluti af málverki eftir Vilhelm Anton Jónsson – Villa naglbít – sem hann málaði sérstaklega fyrir okkur. Fyrir vikið er hann áskrifandi að tímaritinu til lífstíðar. Aðrir þurfa að leggja mun minna af mörkum, en ritnefnd Herðubreiðar þakkar góðan og traustan stuðning.

Næsta ár verður enn skemmtilegra.

Flokkun : Efst á baugi
0,988