Ritstjóri Herðubreiðar 20/05/2014

Yfirkjörstjórn tilkynnti Þjóðskrá um rangt lögheimili oddvita. Stangast á við lög. Samþykkti samt framboðið

Yfirkjörstjórn í Reykjavík sá ástæðu til þess að láta Þjóðskrá vita af rangri skráningu lögheimilis oddvita Framsóknarflokksins í Reykjavík um leið og hún samþykkti framboðslista flokksins fyrir borgarstjórnarkosningar.Yfirkjörstjórn í Reykjavík

Oddviti Framsóknarflokksins í Reykjavík, Sveinbjörg Birna Sveinbjörnsdóttir, býr og starfar í Kópavogi. Þetta kom fram í viðtölum við hana þegar hún var kynnt sem nýr oddviti flokksins, að Guðna Ágústssyni frágengnum.

Af þessum sökum þótti yfirkjörstjórn í Reykjavík rétt að kalla Sveinbjörgu á sinn fund hinn 10. maí, þegar kjörstjórnin úrskurðaði um lögmæti fram kominna framboða. Með Sveinbjörgu mætti á fundinn umboðsmaður listans, Þorsteinn Magnússon.

Frammi fyrir yfirkjörstjórn viðurkenndi Sveinbjörg að rétt væri eftir henni haft í fjölmiðlum, að hún héldi heimili og starfaði í Kópavogi, þótt lögheimili hennar væri skráð í Reykjavík.

Þetta kemur fram í grein sem Eva Hauksdóttir skrifar í Kvennablaðið í gær.

Samkvæmt lögum er kosningaréttur og kjörgengi í sveitarstjórnarkosningum bundinn því að viðkomandi eigi lögheimili í sveitarfélaginu „þegar kosning fer fram“ (2. kafli).

Í fjórðu grein laga um lögheimili segir:

„Leiki vafi á því hvar telja skuli að föst búseta manns standi, t.d. vegna þess að hann hefur bækistöð í fleiri en einu sveitarfélagi, skal hann eiga lögheimili þar sem hann dvelst meiri hluta árs. Dveljist hann ekki meiri hluta árs í neinu sveitarfélagi skal hann eiga lögheimili þar sem hann stundar aðalatvinnu sína enda hafi hann þar bækistöð.“

Þrátt fyrir þessi lagaákvæði úrskurðaði yfirkjörstjórnin framboðslista Framsóknarflokksins gildan.

Þess má geta að Sigmundur Davíð Gunnlaugsson, forsætisráðherra og formaður Framsóknarflokksins, hefur lögheimili að Hrafnabjörgum III í Jökulsárhlíð þótt hann haldi heimili í Breiðholtinu og hafi aldrei átt næturstað á þeim yfirgefna sveitabæ þar sem hann er skráður til heimilis, að sögn eigandans.

Flokkun : Efst á baugi
0,849