Úlfar Þormóðsson 18/01/2016

Vonin blíð

Kristján Þór Júlíusson, heilbrigðisráðherra hefur ekki fengið nokkurn svefnfrið síðustu fjóra til fimm daga. Það er sífell verið að vekja hann í viðtöl vegna gamla fólksins. Stjórnendur hjúkrunarheimilanna í landinu boðuðu til neyðarfundar á fimmtudaginn var ( 14. janúar) vegna erfiðrar fjárhagsstöðu, en þeir áætla að allt að tvo milljarða króna vanti til viðbótar í málaflokkinn á þessu ári. Daginn eftir lét ráðherra hafa það eftir sér að óhætt væri að fullyrða að stjórnvöld hafi unnið að því að styrkja málaflokkinn.

Maður og kona, Jón Thoroddsen

Svo var rætt við hann aftur og enn aftur; í það sinn í Ríkisútvarpinu nú í hádeginu (18.01.). Þar sagðist hann þekkja vel vanda heimilanna og kvaðst vera viss um að ríkið, sveitarfélög og einkaaðilar „komist í gegn um vandann nú eins og tekist hafi síðustu ár.“

Fyrsta athugasemd við feita letrið: Það hefur ekki tekist „að komast í gegn um vandann“ síðustu ár; heimilin eru rekin með halla og urðu að fá fyrirframgreiðslu hjá ríkinu í janúar til þess að geta greitt laun um áramótin.

Ráðherra segist hafa lýst yfir vilja sínum til þess að setjast yfir málin en hvenær það verður veit hann ekki. „Það verður bara tíminn að leiða í ljós. Ég vonast til að það geti orðið, bara við fyrstu hentugleika.“

Önnur athugasemd við feita letrið: Nú veit svo sem enginn hvað orðalagið „við fyrstu hentugleika“ merkir, hvað þá heldur „það verður bara tíminn að leiða í ljós.“ Til dæmis er það hentugt fyrir eldri borgara að þetta verði gert tafarlaust, en eftir dúk og disk ef þá nokkurn tíma, fyrir þá sem varðveita almannafé til gæluverkefna. Það fellur nefnilega fyrr af biðlista eldri borgara af náttúrulegum ástæðum en af öðrum listum; það er sparnaður í því að bíða og sjá hvað setur.

Heilbrigðisráðherrann segir reksturinn mjög misjafnan milli heimila. Samkvæmt skýrslu Ríkisendurskoðunar „skiptir stærð heimilanna ekki máli,“ segir ráðherra, „heldur virtist mestu skipta hvernig haldið væri um rekstrartaumanna í rekstri heimilanna.“

Þriðja athugasemd við feita letrið: Það gefur augaleið að því færri launamenn sem annast fólk á hjúkrunarheimilum, þeim mun ódýrari er reksturinn, því minna sem lagt er í heilnæman mat, dægradvöl og ummönnun, þeim mun minna fé þarf til rekstrarins. Illgjarnir gætu sagt að ráðherrann væri að tala um að spara á nefndum póstum á meðan hinir, sem eru betur þenkjandi, vilja kannski halda því fram að ráðherrann hafi bara verið óskýrmæltur af svefnleysi.

Sjúkratryggingar Íslands sjá um þjónustusamningsgerð við hjúkrunarheimilin fyrir hönd ríkisins. Samningar tókust ekki í fyrra. „Veruleikinn er sá, að það er fjárlagatalan, sem alþingi setur í fjárlögum hverju sinni, sem setur Sjúkratryggingum Íslands í rauninni efri mörk í samningum um þessa þjónustu og þá er verkefnið að finna út hvernig hægt er að leiða út samninga innan þeirra marka,“ sagði ráðherrann í Útvarpið nú í hádeginu.

Fjórða athugasend við feita letrið: Í fjárlögin vantar allt að tvo miljarða í málaflokkinn fyrir árið í ár. Ráðherrann samþykkti fjárlögin svo hljóðandi og felldi tillögu um hærri fjárveitingu.

Þegar ráðherra hafði sagt það sem hér var síðast vitnað til tæpti fréttakona á því sem augljóst er, að það væri varla gerlegt að semja þegar svo mikill munur væri á þörfinni og fjárveitingunni: „Jú, það er örugglega gerlegt en það kallar á það að aðstæður sérhvers heimilis verði skoðaðar sérstaklega.“

Fimmta athugasemd við feita letrið: Aðstæður hvers heimilis merkir, að því samanlögðu sem hér hefur verið vitnað til af orðum ráðherrans, að það sé hægt að semja ef heimilin eru tilbúin til þess að draga úr gæðum þjónustunnar við kynslóðina sem átti hve stærstan þátt í að gera Ísland að velferðarríki. Eitt sinn var vonin blíð hjá því fólki.

Úlfar Þormóðsson
Latest posts by Úlfar Þormóðsson (see all)
Flokkun : Efst á baugi
1,399